Aqtóbe qalasynda 56 mekteptiń aýlasynda qara jamylǵan úsh qyz namaz oqyǵan. Bul týraly zańger Aıgúl Orynbek óziniń Feısbýktegi paraqshasynda bólisti, dep jazady Qamshy.kz aqparat agenttigi.

«Mynaý ne endi? Osyndaı kózboıaýshylyq kimge kerek? Mekteptiń aldynda namaz oqyp, kimge ne dáleldemekshi? Elimizdi Sırıaǵa aınaldyrmaqshy ma? Nege tynysh júrmeıdi? Qaı ata -babań qara jamylǵan? 
Mınıstr Ermekbaev myrza elimizdiń batys jaǵyn shuǵyl qolǵa alý kerek! Mynalar jaqsylyqqa alyp barmaıdy!
Depýtattar mynalarǵa qarsy zań qaıda?», - dep jazdy Aıgúl Orynbek.

Blogerdiń atalmysh jazbasy halyq arasynda qyzý talqyǵa tústi. Keıbiri «namazdy qaza qylýǵa bolmaıdy, kez kelgen jerde ýaqyty kirgende oqý kerek» dep aqtasa, endi biri «kózden tasa jerde oqylý kerek» nemese «kózboıaýshylyq», «kimge ne kórsetpek?» degen syndy pikirler jazyldy.

Aıta keteıik, Aqtóbe qalasynda búginde oramal daýy órship tur. Balalary mektepke oramal taǵyp baryp, sabaqqa qatysa almaı júrgen aqtóbelik ata-analar kúni keshe Májilis depýtaty Baqytbek Smaǵulovqa aryzdaryn aıtty.