Qazaq ánshileriniń arasynda óz rýyn famılıasyna aınaldyrǵan ánshiler kóbeıip keledi. Basqa emes, kóp aldynda júrgen óner juldyzdary óz atyna rýyn jalǵap alyp júr dep jazady "Alash aınasy".
Foto: ori-kuan.kz
Aıtalyq, Nurlan Alban, Asha Mataı, Sara Naıman, Aqylbek Jemeneı, Maıra Kereı. Barlyǵy da — el súıip tyńdaıtyn, ónerde ózindik ornyn qalyptastyryp úlgergen belgili ánshiler. Bulardyń ishinde bastapqyda basqa atpen, ıaǵnı óziniń tegimen shyqqandary da bar.
Mysaly, tańdaıyna bulbul uıalaǵan Maıra ánshi alǵashynda Muhamedqyzy bolyp shyqqandyqtan, jurt ony áli kúnge solaı ataýdan jańylar emes. Tegin kenet Kereı dep aýystyrǵanda, shyny kerek, barsha qazaq Maıraǵa bir túrli tosyrqaı qarady.
Onyń mánin ánshiniń ózi "Eýropa jurtynyń Muhamedqyzy degen uzyn tekti aıtýǵa tili kelmeıtindigimen" túsindirýge tyrysty. Sondaı-aq sol tustaǵy ıslamǵa degen teris kózqaras "Muhammed" ataýyna úrke qarap, qasıetti esimdi kózge shyqqan súıeldeı kórse kerek. Sol sebepti Muhamedqyzy Kereıge aınaldy.
Rýǵa-júzge bóliný, tipti óz rýyn ultynan joǵary qoıý degen másele tóńireginde ózge emes, ánshilerdiń ózi ne oılaıdy?
"Maǵan Shymkent, Atyraý dep bóletinder unamaıdy. Sosyn qazir avtokólikterdiń artyna rýlarynyń atyn jazyp alý sánge aınalypty. Qatarlasyp kelip, betine "ne degen beıshara, ne degen qarańǵy ediń" dep aıanyshpen qaraımyn. Deńgeıi, namysy rýynan aspaıdy", - degen ánshi Sáken Maıǵazıev baspasóz betindegi suhbattarynyń birinde.
Tarıhshy Mámbet Qoıgeldın de ánshilerdiń bul qadamyn quptamaı otyr.
"Menińshe, rýynyń atyn tý qylyp sahna tórine alyp shyǵyp jatqan ánshilerimiz ózderiniń nege boı aldyryp, nendeı qaýipke jol ashyp berip jatqandyǵyn túsinbeıtin sekildi. Sondyqtan men olardy "aınalaıyndar" dep turyp, óz qatelikterin keshikpeı túsinýge shaqyrar edim. Meıli, kim bolsyn, rýǵa bólshekteý, rýlyq sanany qozdyrý arqyly abyroıǵa kenelmesi anyq. Óıtkeni óner degenniń ózi – ulttyq qundylyq, sondyqtan uly óner tek ulttyq deńgeıde kórinis tabady. Sondyqtan rýlyq sana deńgeıinen ósýimiz kerek", - deıdi tarıh ǵylymdarynyń doktory Mámbet Qoıgeldın.
Derekkóz: "Alash aınasy"
