QR Prezıdenti Nursultan Nazarbaev «Nur Otan» partıasy tóraǵasynyń birinshi orynbasary Baýyrjan Baıbekti qabyldady, dep habarlady Aqordanyń baspasóz qyzmeti.
Kezdesý barysynda B.Baıbek Memleket basshysy - partıa tóraǵasyna partıa jumystarynyń nátıjesi týraly baıandady. Sonymen qatar, Elbasy partıa saıası keńesiniń keńeıtilgen aýqymdy otyrysynda « Nurly jol» baǵdarlamasy jaıynda sóz qozǵady. Baǵdarlama álemdik ekonomıkalyq daǵdarysqa qarsy is-qımyl jasaýǵa baǵyttalǵanyn atap ótti.
- Bul baǵdarlama partıanyń qoldaýy aıasynda júzege asyrylatyn bolady, óıtkeni onyń bedeli bar, búkil elimiz boıynsha kóptegen adamdar partıa sapynda tur. «Nurly joldy» qabyldaý - eldiń bolashaq damýy men halyqtyń ıgiligi úshin zor máni bar mańyzdy shara. Osyǵan baılanysty partıa bastaýysh uıymdarǵa súıene otyryp, halyqqa túsindirý jumystaryna den qoıýy tıis, - dedi Memleket basshysy.
Nursultan Nazarbaev ınfraqurylymdy sapaly damytý, jańa jumys oryndaryn ashý, shaǵyn jáne orta bızneske memleket tarapynan qoldaý kórsetý «Nurly jol» baǵdarlamasynyń mindetterine kiretinin aıtty.
- Kásipkerler nesıemen qamtamasyz etilýde, bıznes ashýǵa jaǵdaı jasalyp, tekserýler sany azaıýda. Barlyq kedergiler joıylýda. Jalpy, kásipkerlik Indýstrıalyq-ınnovasıalyq damý, «Nurly jol» baǵdarlamalary, jol jáne baspana qurylysy, turǵyn úı-kommýnaldyq sharýashylyqty jańǵyrtýlar arqyly usynylatyn múmkindikterdi paıdalanýy tıis. Eger partıa Ulttyq kásipkerler palatasymen osy baǵytta tyǵyz yqpaldasatyn bolsa, qajetti nátıjelerge qol jetedi. Ekonomıkany damytý arqyly halyqtyń ál-aýqatyn jaqsartý úshin jumys isteý qajet, - dedi Qazaqstan Prezıdenti.
Tóraǵanyń birinshi orynbasary partıanyń saılaýaldy tuǵyrnamasyndaǵy mindettemeleriniń is júzinde 70 paıyzǵa jýyǵy oryndalǵanyna toqtaldy. Ol Memleket basshysyna qazirgi tańdaǵy basty másele «sybaılas jemqorlyqqa» qarsy is-qımyl baǵdarlamasyn júzege asyrý jónindegi jol kartasynyń bekitilgenin de aıtty.
B.Baıbek sonymen qatar «Nurly jol» baǵdarlamasyn júzege asyrý isine partıanyń qatysýy týraly baıandady.
- Sizdiń tapsyrmańyzǵa sáıkes, Májilistegi jáne máslıhattardaǵy partıa fraksıalarynda «Nurly Jol» baǵdarlamasynyń oryndalýy men Ulttyq qor qarjysynyń paıdalanylýyn qadaǵalaıtyn 4 komısıa quryldy, - dep habarlady partıa tóraǵasynyń birinshi orynbasary .
Kezdesý qorytyndysy boıynsha Memleket basshysy birqatar naqty tapsyrmalar berdi.
Derekkóz: QazAqparat
