Ózbekstan prezıdenti Shavkat Mırzıaev 52 adamnyń ómirin qıǵan apat sebepterin tergeý úshin premer-mınıstr basshylyǵyndaǵy arnaıy úkimettik komısıany jasaqtady, dep habarlaıdy «QazAqparat» HAA tilshisi.

«Ózbekstan Respýblıkasynyń Prezıdenti Shavkat Mırzıaevtiń tapsyrmasymen Premer-mınıstr basshylyǵynda arnaıy Úkimet komısıasy quryldy. Onyń quramyna syrtqy ister mınıstrliginiń, tótenshe jaǵdaılar mınıstrliginiń, ishki ister mınıstrliginiń, densaýlyq saqtaý mınıstrliginiń jáne basqa vedomstvolardyń ókilderi kirdi», - delingen Ózbekstan TJM habarlamasynda.

Ózbekstan TJM málimetterine qaraǵanda, komısıaǵa Qazaqstan ókilderimen birlese otyryp, apattyń týyndaý sebepterin aıqyndaý, el azamattarynyń tulǵasyn taný boıynsha sharalardy júrgizý mindetteri júktelgen.

Eske salaıyq, tótenshe jaǵdaı Aqtóbeden 320 shaqyrym qashyqtyqta Qalybaı kentinen 10 shaqyrym jerde «Samara-SHymkent» tasjolynda bolǵan. Jedel shtabta belgili bolǵandaı, avtobýs jolaýshylary Ózbekstannan Reseıge kúnkóris qamymen bara jatqan. Onda Ózbekstannyń 54 azamaty men 3 qazaqstandyq bolǵan. Avtobýsta shyqqan órt saldarynan 52 ózbekstandyq qaza tapty. Tiri qalǵandardyń arasynda 3 qazaqstandyq jáne 2 ózbekstandyq bar. Olardy jeńil deńgeıde kúıik shalǵan. Oqıǵanyń mán-jaıy tergeý amaldary barysynda anyqtalmaq. Osy oqıǵaǵa baılanysty arnaýly Úkimettik komısıa jasaqtaldy.