Sh.Aımanov atyndaǵy «Qazaqfılm» kınostýdıasy «Muzbalaq» atty tolyqmetrli kórkem anımasıalyq fılmniń treılerin jarıalady. Búrkit pen adamnyń dostyǵy týraly baıandaıtyn bul múltfılm QR Mádenıet jáne sport mınıstrliginiń tapsyrysy boıynsha túsirilgen. Fılmdi rejıser-anımator – Turdybek Maıdan jáne Tilek Tóleýǵazy jasap shyqqan, dep jazady Qamshy.kz aqparat agenttigi. 

Eki jyl kóleminde jasalǵan bul fılmde 40-qa jýyq kınematografıanyń osy janrynda eńbek etip júrgen otandyq mamandar istegen.  Uzaqtyǵy 65 mınýt quraıtyn múltfılm 2D jáne 3D formatynda jasalǵan jáne ár sekýndynda 24-25 kadr sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Tólebaev Erǵalı Dúısenuly, Alma Ádilqyzy esimdi teatr jáne kıno akterleri qatysqan.

-Biz osy «Muzbalaqty» jasaýdan buryn «Tastúlek»  atty qysqa metrli anımasıalyq fılmdi aıaqtaǵan kezimiz, «Qazaqfılmge» Baqyt Ǵafýuly  basshy bolyp  kelgen bolatyn. Ol kisi anımasıa bólimine kelip bizdiń «Tastúlek» anımasıalyq fılmimizdi kórip, unatyp, kóńilinen ótkennen keıin, osy fılmdi ary qaraı tolyqmetrajdy etip jasaýdy tapsyryp, qoldaıtynyn aıtty. Sodan bastap osy taqyryp negizinde jańa tolyqmetrajdy «Muzbalaq» múltfılminiń senarıyn jazdyq, jańa keıipkerlerdi qostyq jáne ekshn janrynda túsiremiz dep sheshtik. Mádenıet jáne sport mınıstrliginiń qoldaýymen osy múltfılmdi jasap shyqtyq, - dedi Tilek Tóleýǵazy.

Avtorlar «Muzbalaq» atty anımasıalyq fılmi arqyly tarıh qoınaýyna enip, joǵalyp bara jatqan,  qazaqtyń ǵasyrlar boıy qalyptasqan saıatshylyq mádenıetin kórsetý arqyly, adammen búrkit arasyndaǵy senim negizine quralǵan dostyqty jas urpaq sanasyna sińirýdi kózdeıdi.

-Bes jasar búrkitti qazaq Muzbalaq deıdi. Qazaq bul tákappar qusqa jas ereksheligine qaraı at qoıady. Biz ańǵa shyqpasaq ta, ańshylardyń áńgimesin tyńdap óstik. Úlkendermen erip, ańdy qalaı tuzaqqa túsirýge bolatynyn da shet jaǵalap kózimizben kórdik. Qyrandy qalaı qondyryp, tuǵyryna qalaı otyrǵyzý qajettigin, atty qalaı baptap, qalaı jaratatynyn, qusty qalaı qolǵa ustaýǵa bolatynyn bizdeı eshkim bilmesi anyq, - dedi Turdybek Maıdan.

Esterińizge sala keteıik, kınostýdıa 2017 jyly eki tolyqmetrli anımasıalyq fılmdi óndirdi. Sonyń biri «Muzbalaq» bolsa, ekinshisi rejıser Adaı Ábildanyń tarıhı tulǵa, qolbasshy Kúltegin týraly kartınasy. Atalǵan fılmder tolyqqandy aıaqtalǵan jáne prokaty men tusaýkeseri ústimizdegi jyldyń kóktemine josparlanǵan.

Anotasıa:

Erte zamanda adamdar kesirinen jer astyndaǵy aıdaharǵa aınalap kele jatqan abjylan oıanyp, jer betine shyǵyp, mańaıyn jalmap, qazaq aýylyna úlken apat ákelip, úreı týǵyzady. Ol aýyldy otqa orap, qarsy kelgendi jalmap kele jatqanda, bir qyran búrkit balapanyn qorǵap, onymen aıqasady. Aqyry abjylan qaıta jer astyna qashyp joq bolady. Al qyran otqa oranǵan uıadan balapanyn alyp, alysqa ushyp ketedi. Adam jutyp dánikken abjylan kún tutylyp, óziniń aıdaharǵa aınalar sátin asyǵa kútedi...