Aqtóbe aımaǵynda avtobýstaǵy órtten qaza tapqan 52 adamnyń 44-iniń súıekteri oblys ortalyǵyna jetkizildi. Qaıǵyly oqıǵadan aman qalǵan 5 adam Aqtóbe aýrýhanasynyń jansaqtaý bólimine jatqyzyldy. Dárigerler olardyń ómirine qaýip joǵyn aıtady, dep Azattyqqa súıene otyryp jazady Qamshy.kz aqparat agenttigi.
44 máıit Aqtóbege jetkizildi
Qańtardyń 18-inde Aqtóbeden 320 kılometr qashyqtaǵy "Samara-SHymkent" tasjolynda jolaýshylar avtobýsynda bolǵan órtte qaza tapqan 52 adamnyń 44-iniń súıekteri sol kúni oblys ortalyǵyna jetkizildi. Basym kópshiligi qatty kúıip qalǵandyqtan qurban bolǵandardyń kim ekenderin anyqtaý qıyn bolyp otyr dep málimdedi oblys ákimdiginde jumaǵa aýǵan túni ótken brıfıńte Qazaqstan ishki ister mınıstriniń orynbasary Erlan Turǵymbaev. Onyń aıtýynsha, qalǵan 8 adamnyń súıekteri Aqtóbege ekinshi kólikpen juma kúni jetkizilmek.
- Oqıǵa bolǵan jerde kúsheıtilgen tergeý toby jumys istep jatyr. Mamandardyń jumysyna aýa raıynyń qolaısyzdyǵy jáne oqıǵa ornynda óte aýqymdy jumystardyń atqarylýy qıyndyq keltirip otyr. Krımınalıser men sarapshylar túni boıy máseleniń mán-jaıyn zerttep, 19 qańtar kúni tús aýa avtobýstaǵy órttiń naqty sebebin aıtýlary tıis, - dedi vıse-mınıstr.
Erlan Turǵymbaev Aqtóbe oblysynda jolaýshylar avtobýsy órtenip, 52 adamnyń qaza bolýyna baılanysty Astanada arnaıy qurylǵan úkimettik komısıa músheleriniń biri. İshki ister mınıstriniń orynbasary salonynda 57 adam bolǵan avtobýs jol apatyna ushyramaǵany jáne oqıǵa ornynan qandaı da bir qylmys belgileri baıqalmaǵany týraly aıtty. Tas joldyń boıynda qańqasy ǵana qalǵan avtobýstaǵy órtti Erlan Turǵymbaev "oqys oqıǵa" dep atady.
Órtten aman qalǵandardyń aıtýynsha, salonnan aldymen tútin ıisi shyqqan. Jolaýshylar sol ıisten ýlanǵan bolsa kerek. Júrgizýshiler kólikti dereý toqtatyp, jolaýshylardy qutqarmaq bolǵanyn aıtty. Biraq avtobýstyń esigin ashqanda salonǵa lap etken otteginiń áserinen órt bastalǵan. "Setra" – qos qabatty avtobýs. Kólik júrgizýshileri avtobýstyń birinshi qabatyna júk tıelgenin, jolaýshylardyń ekinshi qabatta otyrǵanyn aıtady. Birden boı bermeı ketken jalyn salondaǵy júkti kúlge aınaldyryp, adamdardyń syrtqa shyǵýyn qıyndatqan, - deıdi Erlan Turǵymbaev.
Úkimettik komısıanyń taǵy bir múshesi, Qazaqstannyń ınvestısıalar jáne damý mınıstriniń birinshi orynbasary Roman Sklárdyń aıtýynsha, X 335 PCM degen memlekettik nómirmen tirkelgen "Setra" markaly avtobýs Qazaqstannyń Shymkent qalasynan shyǵyp, Reseıdiń Qazan qalasyna jolaýshylar apara jatqan. Halyqaralyq baǵyttarda turaqty qyzmet kórsetpegen, salonynda 57 jolaýshysy bar kólik "Samara-SHymkent" tas jolynyń 1068-shaqyrymyna jetkende órtengen.
Avtobýstaǵy 57 adamnyń 52-si syrtqa shyǵa almaı qalǵan. Óz kúshterimen shyqqan bes adamnyń biri – 50 jastaǵy kólik júrgizýshisi Nurjan Qyrǵyzbaev Ońtústik Qazaqstan oblysynyń turǵyny. Júrgizýshiniń 33 jastaǵy kómekshisi Maqsat Pernebekov pen 40 jastaǵy jolaýshy Bolat Tańatarov ta sol aımaqtan. Olarmen birge Ózbekstan azamattary – 1988 jyly týǵan Aror Iskakov pen 1980 jyly týǵan Israıldjon Mırzahmedov te apattan aman qalǵan, - dep habarlady Roman Sklár.
Úkimettik komısıamen birge oqıǵa ornyna baryp kelgen Aqtóbe oblysy ákiminiń orynbasary Serik Tólenbergenov oqıǵa ornyndaǵy ahýaldyń kúrdeli ekenin aıtady.
- Aqtóbedegi sot-medısınalyq saraptama ortalyǵy táýlik boıy jumys isteıtin bolady. Óıtkeni, ázirshe qurban bolǵandardyń kim ekeni anyqtalǵan joq. Marqumdardyń aty-jóni belgili bolǵannan keıin ǵana olardy Ózbekstan jaǵyna berý týraly sheshim qabyldanady, - dedi Tólenbergenov.
