Ózbekstannyń mektepke deıingi bilim berý mınıstrliginiń saıtynda habarlanǵandaı, prezıdent Shavkat Mırzıaevtiń kenje qyzy Shahnoza Ýmarova mektepke deıingi bilim berý mekemeleriniń qyzmetin uıymdastyrý basqarmasy basshysynyń orynbasary bolyp taǵaıyndalǵan, dep Azattyqqa súıene otyryp jazady Qamshy.kz aqparat agenttigi.
Ótken jyly 18 jeltoqsanda Shavkat Mırzıaev ótkizgen selektorlyq jıynda Shahnoza Ýmarova mektepke deıingi bilim berý mınıstri Agrıppına Shınmen qatar otyrǵan.
Mektepke deıingi bilim berý mınıstrligi 2017 jyly 30 qyrkúıekte prezıdenttiń «Mektepke deıingi bilim berý júıesin túbegeıli jetildirý sharalary týraly» jarlyǵymen qurylǵan.
Ótken jyldyń sońynda bılik Ózbekstanda Ońtústik Koreıanyń tájirıbesi negizinde bala baqshalar qurylatynyn habarlaǵan bolatyn.
Budan erterek Mırzıaevtiń qyzynyń jaqyn serikteriniń biri Shahnoza Ýmarova ákesi prezıdent bolyp saılanǵanǵa deıin birneshe jyl Ońtústik Koreıada turǵanyn jáne endi ol tájirıbesi jańa jumysynda paıdaǵa asýy múmkin ekenin habarlaǵan.
31 jastaǵy Shahnoza Ýmarova Otabek Ýmarovqa kúıeýge shyqqan. Keıbir ózbek BAQ-ynyń jazýynsha, Ýmarov Mırzıaevtiń «jeke kúzetshisi» sanalady. Ótken jyldyń basynda Eltuz.com ınternet basylymy Mırzıaev kishi kúıeýbalasy Otabek Ýmarovty prezıdenttiń qaýipsizdik qyzmetine jumysqa alǵanyn habarlaǵan bolatyn. Saıt aqparatyna qaraǵanda, Ýmarov 2017 jyly qańtardyń basynda prezıdent qaýipsizdik qyzmeti basshysynyń birinshi orynbasary bolyp taǵaıyndalǵan.
