Aqtaý turǵyndary muz aıdynynda ótken aksıa barysynda birin-biri taptady, - dep habarlady "Lada" basylymy.

Eske sala keteıik, qazaqstandyq bankterdiń biri turǵyndarǵa tegin kónkı tebý múmkindigin elimizdiń birneshe qalasynda usynǵan bolatyn. Muz aıdynynyń mańyndaǵy qujynaǵan halyqtyń vıdeosy qazir áleýmettik jelilerde de órip júr.

Endi suraq týady, nege osy qazaqstandyqtar tegin dúnıege áýes? Aqtaýdaǵy ábigerdi syrǵanaýdyń sıqyryna ergen jurttyń áýestigine telýge bola ma? Eger mundaı jaǵdaı alǵash ret oryn alyp otyrsa, sondaı baılam jasaýǵa da bolar edi. Alaıda tegin nemese arzan dúnıe úshin halyqtyń bir-birin taptap kete jazdaǵany alǵash ret emes qoı. Ótken jyly Atyraýda da osyǵan uqsas oqıǵa bolǵan. Suıyq maıǵa 50 paıyzdyq jeńildik jasaǵan sýpermarketterdiń biri jurt nópiriniń astynda qaldy. Qujynaǵan halyq satýshylardyń ózin taptap kete jazdaǵan. Eger «Aqtaý men Atyraý jurty-aq sóıtip júredi eken» degińiz kelse, mysaldy Almatydan keltiremiz. 2016 jyly iri saýda ortalyqtarynyń biri klıent tartý maqsatynda elde joq aksıa oılap tapqan edi. Aksıanyń sharty boıynsha dúken kasasyna sheshingen qalpynda kelgen adam 5 myń teńgege deıingi taýardy tegin alady. Alǵandar az bolǵan joq. Dambalshań kúıinde paket-paket taýar kótergenderdiń qataryna qyz-kelinshekter de qosylyp ketti.

Endi osyny neden dep oılaısyz? Qazaqstan halqy qaltasyndaǵy tıynyn ózinen aıaıtyn sonshalyqty sarań ba? Asyp ketse, muz aıdynynyń bıleti birer myń teńgeniń shamasy. Almaty dúkeniniń beretini – 5 myńnyń taýary. Sol úshin aq qar, kók muzda bar sharýany ysyryp qoıyp, teginge umtylýǵa, 5 myńnyń taýary úshin jerden shyqqandaı bolyp, lypamen júrýge ıtermeleıtin qandaı kúsh, nendeı sıqyr?

Bilesiz, qazaq bıligi elimizdi damyǵan otyzdyqtyń qataryna qospaq nıette. Qazaqstannyń qazirgi deńgeıiniń ózine bıliktiń kóńili toǵaıady. Qalasa, «artta qalǵan», «jaǵdaıy múshkil» memleketterge gýmanıtarlyq kómek beredi. Arǵyny aıtpaı-aq qoıaıyq, sońǵy jyldardyń ózinde elimiz shetelge 10 mlrd. teńgeden astam gýmanıtarlyq kómek jasapty. Muny byltyr Májilis tóraǵasynyń orynbasary V.Bojkonyń aýzyn toltyryp turyp aıtqany esimizde.

Bizdi mazalaıtyny mynaý ǵoı. Sheteldikter arzan suıyq maı úshin opyr-topyr uılyǵyp jatqan, jarty dorba azyq-túlik úshin tyrdaı bolyp júrgen qazaqstandyqtardy kórse, ne oılaıdy? Oǵan daý joq, «e, bularyń naǵyz sarań, shyq bermes Shyǵaıbaıdyń ózi eken» deıdi. Al endi Sizge suraq: qalaı oılaısyz, Qazaqstannyń halqy sarań ba, álde halqynyń áýpirimdep áreń kún kórip júrgenin bilmeıtin, estimeıtin bıligi kereń be?

Sansyzbaı Nurbaba