Qazaqstan avtobıznes qaýymdastyǵy málimetine súıensek, elimizden eksporttalatyn 1480 tehnıkanyń baǵasy – 5,8 mlrd teńge. 2017 jyldy qorytyndylaǵan Qazaqstan avtobıznes qaýymdastyǵynyń málimetinshe, Qazaqstandaǵy avtokólik óndiretin alty zaýyt 12 aı ishinde 19 086 tehnıka jasap shyǵarǵan. Onyń ishine júk tasıtyn kólik, avtobýs jáne jeńil avtokólikter kiredi. Jalpy quny – 139,5 mlrd teńge. Bul kórsetkish 2016 jylmen salystyrǵanda úsh ese kóp. Al Qazaqstanǵa avtokólik óndirisinen túsken paıda17 paıyzǵa artqan.

Tómendegi kestede 2017 jyldyń qańtar-jeltoqsan aralyǵyndaǵy ımporttyq jáne qazaqstandyq avtokólikterdiń resmı satylym kórsetkishi kórsetilgen.

Qazaqstandyqtar ýaqyt ótken saıyn jergilikti ónimdi satyp alýǵa beıimdelip keledi. 2017 jyly elimizde 17 416 jeńil kólik, komersıalyq tehnıkalar men avtobýstar satylǵan. Jalpy satý kólemi – 120,5 mlrd teńge. Al Qazaqstanda jasalǵan avtokólikterge degen suranys jyl sońyna deıin 33,5 paıyzǵa ósti. 

Qazaqstandaǵy avtokólik óndirisindegi úzdik kompanıalardy atap ótsek:

1. Qostanaılyq «SaryarqaAvtoProm» kompanıasy jańa markaly avtokólikterdiń satylymǵa shyǵaryp, óndiris kóleminiń edáýir ulǵaıtty. 2017 jyly atalmysh kompanıa Hyundai avtokóligin lokalızasıadan ótkizýmen qatar, Ravon jáne Chevrolet Niva avtokóligin óndirýdi bastady. 2017 jylǵy qorytyndy boıynsha, kompanıa baǵasy 71,3 mlrd teńge bolatyn 5 912 transporttyq ónim óndirgen.
2. «Azıa Avto» kompanıasy 2017 jyly jalpy qarjy kólemi 42,7 mlrd. teńge bolatyn 11 412 avtokólik óndirdi.
3. «Kamaz-Injınırıng» qazaqstandyq-reseılik birlesken kásiporny 13,6 mlrd. teńgege 820 júk kóligin óndirgen.

Al tómendegi kesteden Qazaqstannan eksportqa jiberilgen avtokólikterdiń úzdik úshtigin kóre alamyz.

Qazaqstandyq avtokólikterdi eksporttaý segiz esege artqan. Bul – komersıalyq avtokólikter men jeńil kólikterdiń óndirisin 36 paıyzdan 53 paıyzǵa deıin arttyrýdyń nátıjesi. 2017 jyly Qazaqstannan alys-jaqyn shetelderge quny 5,8 mlrd teńge bolatyn 1480 avtokólik jiberildi. Shetelge attandyrylǵan júk kólikteriniń kóshin bastap turǵan óndirýshi kompanıa – Hyundai Trans Auto. Hyundai HD 78 jáne Hyundai HD 35 júk kólikteri Reseı, Belarýs, Qyrǵyzstanǵa eksporttalǵan. Sonymen qatar 1 205 Lada 4x4 avtokóligi Qytaıǵa jóneltilse, 66 JAC S3 krosoveri Tájikstan men Reseıge eksporttalǵan.

Jańa markaly avtokólikterge suranys 6,1 paıyzǵa artqan.

Otandyq avtokólikterdiń satylymy boıynsha úzdik bestikti atap óteıik:

2016, 2017 jyldary satylym boıynsha kóshti bastap turǵan avtokólik – Toyota. Jyl ishinde 9 267 avtokólik satylǵan.

Ekinshi orynǵa Lada avtokóligi jaıǵasty. Satylym – 8 733 dana.

Al úshtikke Ravon avtokóligi endi. Satylym sany – 4 621.

Tórtinshi orynǵa 3 624 kólik satylǵan Hyundai ornalasty.

Úzdik bestikti 821 komersıalyq tehnıkasymen GAZ 2 markasy túıindep tur.

2017 jyldy qazaqstandyq avtokólik naryǵynda resmı túrde usynylǵan qyryq bes brend kompanıalardyń basym kópshiligi jaqsy satylym kórsetkishimen aıaqtady. Arzan avtokólikterdi satý kóleminiń artýy aıasynda BMW markaly 503 kólik satyldy, al Lexus áli alda kele jatyr – 1,164 dana ótkizgen. Mercedes-Benz markasy 280 satylymmen úshinshi orynǵa turaqtady.

Qazaqstan avtobıznes qaýymdastyǵy dırektorlar keńesiniń múshesi Anar Maqashevanyń aıtýynsha, 2017 jyl kásipkerler jáne óndirýshilerdiń úmitin aqtaǵan.

– 2017 jyly resmı túrde satylǵan jańa avtomobılderdiń úlesi 75 paıyz, al 2013-2014 jyldary 50 paıyzǵa da jetpeıtin. 2018 jyly da osy úrdis jalǵasady. Bıydl ósim deńgeıi 15-20 paıyzǵa artady dep boljap otyrmyz. Bul eń aldymen otandyq avtomobılderge degen suranysqa baılanysty, al bıyl memleket 8 mlrd teńge kóleminde jeńildetilgen nesıelendirýge qosymsha transh bóletin bolady, – dep atap ótti Anar Maqasheva.