Aqmola jáne Soltústik Qazaqstan oblystarynyń eki azamaty Reseıge zańsyz ótip ketpekshi bolǵan, dep habarlaıdy Qamshy.kz aqparat agenttigi QazAqparat-qa silteme jasap.

Sot materıaldaryna sáıkes, 2017 jyly 21 qazanda eki er adam Sharbaqty aýdany arqyly Reseıge zańsyz ótip ketken. Alaıda shekarashylardyń qolyna tústi. Sotta M. esimdi azamat óz kinásin moıyndap, týysqanymen birge atalǵan quqyq buzýshylyqqa ne úshin barǵanyn túsindirdi. Onyń aıtýynsha, týǵan-týystardyń ótinishi boıynsha Reseıde ákesiniń «qyrqyn» bergisi keldi. Sebebi qaıtys bolǵan ákesi - Reseı Federasıasynyń azamaty. Alaıda uly kórshi memleketke zańdy jolmen shyǵa almady. Óıtkeni bankten alǵan nesıe boıynsha qaryzy bar. Al ondaı adamdarǵa shetelge shyǵýǵa ruqsat joq. Osydan keıin ol aǵasy ekeýi shekara beketin aınalyp ótip, Reseıge zańsyz ótip ketýge bel býǵan.

«Pavlodar oblysy Sharbaqty aýdandyq soty Aqmola jáne Soltústik Qazaqstannyń eki azamatyn Qylmystyq kodekstiń 392-baby, 1-tarmaǵy boıynsha kináli dep tanyp, 6 aıǵa shartty túrde bas bostandyǵynan aıyrý jazasyn taǵaıyndady», - delingen sottyń resmı habarlamasynda.