İzdeýde júrgen azamatshany ózin «taksıpin» dep tanystyrǵan jas jigit aıýandyqpen óltirdi. Marqumnyń týystary kúdiktini úsh birdeı qylmystyq is boıynsha jaýapqa tartýyn talap etti dep jazady Qamshy.kz aqparat agenttigi otyrar.kz-ke silteme jasap.

Jumabekovtar otbasy qaıǵydan qan jutyp otyr. Eki apta buryn úıinen aman esen shyǵyp ketken qyzdarynyń óli denesin taýyp, jer qoınyna tapsyrǵan. Sumdyq jaǵdaı, osydan eki apta buryn oryn alǵan. Qyzdary Aıgerim Tasbolatova Túrkistandaǵy ortalyqta ornalasqan bankomattan anasy men ákesiniń aılyǵyn alǵan eken. Muny baıqaǵan jas jigit qomaqty qarjy alǵan azamatshany kóligine aldap mingizip, kópshilikten tys jerde ony qınap óltiripti.

Jaqsylyq Jumabekov, marqumnyń ákesi: "Denesin Dostyq aýylynyń shetinen tapqan. Qyzymnyń máıitin ózim kórdim. Aıýandyqpen uryp óltirgen. Adam shoshyrlyq kúıde. Bet aýzy kógerip ketken. Qyzymdy áreń degende tanydym. Bet álpeti múldem kórinbeıdi".

Aıgerim Tasbolatovaǵa týysqandary osy jyldyń altynshy qańtary kúni izdeý salǵan. İİB aryzdanyp, tipti prokýratýra qyzmetkerlerinen kómek surapty. Arada bir jeti ótkende polıseıler Túrkistan qalasyndaǵy saýda ortalyqtarynyń birinen qyzdyń uıaly telefonyn tabady. Sóıtse urlyqy telefondy satýshyǵa taksıst jigit arzan baǵaǵa satyp ketken eken. Biraq satýshy Aıgerimniń uıaly telefonyn ustap júrgen jigitti sýretke túsirip alǵan. Osy sýrettiń arqasynda qandy qylmys jasady degen kúdikti birden ustalyp, qamaýǵa alynǵan.

OQO İİD baspasóz qyzmeti habarlaǵandaı kúdikti qazir qamaýda. Sotqa deıingi tergeý amaldary júrgizilýde. Boıjetkendi aıýandyqpen óltirdi degen azamat eki aptadan keıin qylmysyn moıyndap, máıitti ózi taýyp bergen. Muny quzyrly organ ókilderi de rastap otyr.

Saltanat Qaragózova, OQO İİD baspasóz qyzmetiniń jetekshisi: «Saraptama taǵaıyndaldy. Osy is boıynsha 1992 jylǵy jergilikti turǵyn ústaldy. Marqum qyzdyń ata-anasy 11 qańtar kúni aryzdanǵan. Al kúdiktiniń ózi eki aptadan keıin ustalyp otyr».

Jumabekovtar otbasy qyzdaryn óltirgen azamat zań aldynda birneshe is boıynsha jaýap bersin dep talap etýde. Óıtkeni kúdikti qyzdyń uıaly telefony men aqshasyn qoldy etip, keıin ony zorlap óltirdi deıdi. Biraq boıjetkenniń zorlyq kórgenin rastaý úshin saraptama jumystarynyń qorytyndysy qajet.

Laýra Naqypqyzy