Júzden astam otbasy qurt-qumyrsqamen turýǵa májbúr. 50 jyl buryn salynǵan kópqabatty úıdiń ábden tozyǵy jetken. Tipti, jertóleden bastap, joǵarǵy qabattarǵa deıin ylǵal tartyp ketken. Qabyrǵalary shylqyǵan sý. Alaıda, ákim-qaralar esh kómek bere almaımyz dep otyr. Bul týraly Qamshy.kz aqparat agenttigi habarlaıdy. 

 «Myna jerdiń barlyǵy tarakan. Tarakannan kóz ashpaımyz. Mine, mine tarakan! Myna jaqtyń barlyǵy tarakan, myna jerdiń barlyǵy tolyp turady. Tarakan jetedi. Úıde balalar bar, mynda voobshe balalap jatyr» - deıdi úıdiń turǵyny Janar Jaqypova.

Janar Jaqypova otbasymen birge munda 8 jyl buryn kóship kelgen. Biraq, bar jıǵan-tergenin baspanaǵa salǵan januıanyń qýanyshy uzaqqa sozylmady. Óıtkeni, dál osy páterde baýyr eti balasynan aıyrylǵan. Qabyrǵasy kógerip, ábden ylǵaldanǵan úıde eki jasar sábıiniń ókpesine salqyn tıip, shetinen ketipti... 

«2017 jyly osy bronhodan salqyn tıip, aýyryp, shetinep ketti. Ekstrenno bolnısaǵa túsip, erteńisine reanımasıaǵa túsip, komaǵa tústi. Sodan soń shetinep ketti. Osynyń kesiri, ótip ketken syrost Úıdiń barlyǵy syrost - deıdi qala turǵyny Janar Jaqypova.

Kórshileriniń bul jan kúızelisi úlken sabaq bolsa kerek, osydan soń jataqhana turǵyndary sıreı bastaǵan. Kópbalaly ana Zıada Mamyrbaı páterin bos qoıyp, dereý bul úıden kóship ketken. Onsyz da eki birdeı múgedek balasynyń qamyn oılap, búginde basqa turǵyn úıden páter jaldap otyr. 

«Mynanyń barlyǵy júndeıdi... Kógergen erýnda. Osydan qanshama balam aýrý taýyp otyr. Balalarym úshin amaldyń joqtyǵynan osy jerdi tastap, kvartıraǵa kóship otyrmyn. Bir pensıaǵa jaldap, úıden kóshýge májbúr bolyp otyrmyn shynyna kelgende» - qala turǵyny Zıada Mamyrbaı.

Turǵyn úıdiń qoldanysqa berilgenine bıyl 50 jyl tolady. Kúni búginge deıin jóni túzý jóndeý kórmegen. Kireberisin attap basqannan-aq, kógergen ıis mazańdy alady. Qabyrǵalary bolsa, ylǵaldan shylqyp tur. Biraq, buǵan bas qatyryp otyrǵan bılik joq deıdi, ashynǵan turǵyndar.    

«Eshqandaı bizge jaǵdaı jasap, adamdar turyp jatyr eken ǵoı dep baqylap kelip jatqan adam joq. Ákimdikti bilmeımin, osyndaı obshejıtıanyń bar ekenin bilmeıdi ıa bolmasa bizdiń qaǵazymyzdy qarap jatqan joq. Joldan qaıtyp ketip jatyr ma, áli bizge eshqandaı jaýap kelgen joq» - qala turǵyny Gúlmıra Sybanova.

Páter ıeleri kooperatıvi bolsa, kerisinshe turǵyndardy kinálaıdy. Halyq tıisti tólemderdi ýaqytyly jasamaıdy, dep aqtalady. 

«2 myńnan jınańdar páteraqy esebinen mestamı hotá by kosmetıcheskıı remont istep, qystan shyǵaıyq. Kelesi jyly Úkimet árqaısymyzdyń jeke páterimiz bolsa da, endigi jyly kómektesedi Úkimet dep aıttym men bárine. Biraq eshqandaı rezýltat joq» - páter ıeleri kooperatıviniń tóraıymy Ulá Arynova,

Al qalalyq turǵyn úı ınspeksıasy turǵyn úı  jeke adamnyń múligi ekendigin aıtady. «Ortaq múlik bolmaǵandyqtan, aralasa almaımyz» deıdi. 

«Muny endi apatty dep taný úshin sol jerde turǵan turǵyndar ózderi birlesip, táýelsiz ekspertke baryp, sol úıdi kórsetip soǵan zaklúchenıe alý kerek. Sol zaklúchenıe alǵannan keıin olar myna SON arqyly bizge tıisti qujattaryn ótkizedi» - qalalyq turǵyn úı-kommýnaldyq sharýashylyǵy ınspeksıasynyń bólim basshysy Berik Sármenbaev.

Eger turǵyndar úıdiń apatty jaǵdaıda ekendigin dáleldeıtin táýelsiz sarapshynyń qorytyndysyn alyp kelse sol qujat arqyly jańa úıdiń kezegine turýǵa múmkindik bar. Basqa tyǵyryqtan shyǵar ázirge jol joq.