Taldyqorǵandaǵy mektepterdiń birinde pılottyq rejımde «Kásipkerlik jáne bıznes negizderi» engizildi, dep jazady Qamshy.kz aqparat agenttigi. 

Taldyqorǵan qalasynyń Shoqan Ýálıhanov atyndaǵy №10 mektep-gımnazıasynda tájirıbe júzinde «Kásipkerlik jáne bıznes negizderi» atty jańa pán oqytylýda. Sabaqtar aptasyna bir ret 10 synyp oqýshylary úshin júrgiziledi. Pándi engizýdegi basty maqsat - mektep oqýshylaryna kásibı baǵdar berý, kásipkerlik qyzmetti júrgizýge daǵdylandyrý.

«Pán pılottyq rejımde oqytylyp jatyr. Onyń qorytyndysy boıynsha aldaǵy ýaqytta óńirimizdiń barlyq mektepterinde engizý josparlanǵan. Oqýshylarǵa bilim berý prosesine muǵalimdermen qatar, kásipkerler de qatysady. Baǵdarlama birneshe kezeńderge bólingen, oqytý birtindep ótkiziledi. Kýrs sońyna qaraı mektep túlekteri kásipkerlik negizderi boıynsha bazalyq bilimderi qalyptasady», - deıdi Almaty oblysy Kásipkerler palatasy Adamı kapıtaldy damytý bóliminiń sarapshysy Ardak Kachkarova.

Sarapshynyń aıtýynsha, teorıamen qatar, tájirıbelik sabaqtar túrli kásiporyndar negizinde ótedi. Tabysty kásipkerlermen kezdesý, sheberlik synyptary uıymdastyrylady.

Kásipkerlik negizderi boıynsha alǵashqy sabaqtardyń birine Óńirlik kásipkerler palatasynyń bıznes-treneri Aleksandr Kýznesov qatysty. Ol oqýshylardyń qoıǵan saýaldaryna jaýap berdi. 

«Qandaı bıznes túrin ashsam bolady jáne aqshany qaıdan alamyn?» degen suraqqa bylaı jaýap bergim keledi. Ózgelerden úzdik meńgergen, «qolymnan keledi» degen ispen aınalysý kerek jáne kórsetiletin qyzmettiń suranys deńgeıin bilý qajet. Suranys bar bolǵan tusta taýardy nemese qyzmetti biletin bolady, ony satyp alady jáne isińiz órge domalaıdy. Kásipti óz qarjyńyzǵa bastaǵan durys. Árıne, bul qıyn bolǵanymen, eń tıimdi jol bolyp sanalady», - deıdi maman. 

Jańa pánniń baǵdarlamasyna ekonomıkalyq termınder, bıznes-jospardy ázirleý, zańdy tulǵany tirkeý, qarjylyq esep, bıznesti quqyqtyq retteý syndy taqyryptar engen.

Aldaǵy kezeńde Bilim jáne ǵylym mınıstrligi synama pándi elimizdegi barlyq mektepter, kolejder men JOO-lar baǵdarlamasyna engizýdi josparlap otyr.