"Munaı jáne energetıka salasynyń halyqaralyq dárejedegi mamandary Qazaqstanda daıyndalýy kerek", - dep málimdedi Tımýr Qulybaev.
Álemdik energetıka korporasıalary otandyq joǵary oqý oryndardyń bazasynda maman daıyndaýǵa jaǵdaı jasaýda
26 qańtarda Almatyda KAZENERGY qaýymdastyǵy Keńesiniń 22-kóshpeli otyrysy ótti. Jıynǵa «Atameken» QR UKP Tóralqa Tóraǵasy Tımýr Qulybaev qatysty, dep habarlaıdy Qamshy.kz aqparat agenttigi.
Keńes otyrysyn ashqan Tımýr Qulybaev KAZENERGY qaýymdastyǵy atqarǵan jumysqa oń baǵa berdi. Sonymen qatar, Ulttyq kásipkerler palatasynyń basshysy 2017 jyly jer qoınaýyn paıdalaný men salyq kodeksteriniń qabyldaý da erekshe mańyzǵa ıe shara ekenin atap ótti.
«Bárińizge belgili, qaýymdastyq músheleri salyq jáne jer qoınaýy týraly kodeksterdiń daıyndalýyna belsene qatysty. Usynysymyzdyń kóbi osy qujattarǵa endi. Bizdiń zańǵa engizgen ózgertýlerimiz ınvestısıalyq tartymdylyqty arttyryp, osy arqyly elimizdegi ınvestısıalyq ahýaldyń jaqsaratynyna senemiz. Sondaı-aq energetıka sektorynyń jumysshylaryna Qazaqstanda tabysty jumys isteý úshin jaǵdaı jasalady degen úmittemiz», - dedi «Atameken» UKP Tóralqa Tóraǵasy.
Jıyn barysynda Tımýr Qulybaev Qaýymdastyq adamı kapıtaldy damytýǵa erekshe kóńil bólip otyrǵanyn atady. Ulttyq palata basshysy Qazaq-Brıtan tehnıkalyq ýnıversıtetinde otandyq iri munaı-gaz kompanıalarynyń kómegimen jabdyqtalǵan zerthanalarmen tanysty.
«Qaýymdastyq quramyndaǵy 83 kompanıanyń maman daıyndaýdaǵy mindettemesi bar. Búgingi jıyn Qazaq-Brıtan tehnıkalyq ýnıversıtetinde ótkizilýi tegin emes. Munaı-gaz jáne energetıka salalaryna maman daıyndaý qandaı deńgeıde ekenin kózben kóre alamyz. Zerthanalar jaqsy jabdyqtalǵan. Sondaı-aq bul ýnıversıtettiń qaramaǵynda eki akademıalyq ınstıtýt jumys isteıdi. Biz osy áleýetti paıdalanýymyz kerek. Qazirgi tańda bilim berýdiń jańa baǵyttary qolǵa alynyp jatyr, bizge qandaı mamandar qajet ekenin aıtýymyz kerek. Tek munaı óndirýde emes, kólik, qaıta óńdeý, hımıa salalaryna da qajettini usyný qajet. Salalardyń aldynda turǵan mindet, biz mamandardy Qazaqstanda daıyndaýymyz kerek. Mysaly «Chevron» kompanıasy bastapqyda mamandardy shetelde daıyndaýdy qalady. Alaıda osy Qazaq-Brıtan tehnıkalyq ýnıversıtetiniń qabyrǵasynda zerthana ashty. Halyqaralyq dárejedegi mamandar Almatyda daıyndalady», – dedi Tımýr Qulybaev.
Keńes otyrysyna QR Energetıka mınıstri Qanat Bozymbaev qatysty. Mınıstr JİÓ artýynda «Qazaqstan – otyn-energetıkalyq kesheni» lokomotıv bolǵanyna basa nazar aýdardy.
«2017 jyly munaı-gaz jáne energetıka salasynda kórsetkish jaqsy. Bizdiń aldymyzda osy qol jetkizgen trendterdi saqtaý jáne damytý mindeti tur. Múmkin 10,5 %-ǵa ósý bolmas, degenmen oń nátıje bolady dep boljap otyrmyz. Qaýymdastyqqa alǵys bildirgim keledi, byltyr bizdiń salaǵa qatysty negizgi qujattardyń daıyndalýyna kúsh saldyq. Jer qoınaýyn paıdalaný kodeksi men Salyq kodeksine túbegeıli ózgerister engizildi. Qaýymdastyqtyń qoldaýy bolmasa, osyndaı sapaly qujat daıyndalmas edi. Bıyl Jer qoınaýyn paıdalaný týraly kodeksti júzege asyrýda 52 normatıvti quqyqtyq akti daıyndaýymyz qajet», – dep habarlady mınıstr.
Qaýymdastyq Keńesiniń otyrysynda KAZENERGY bas dırektory Áset Maǵaýov 2017 jylǵy jumys jospary men maqsatty jobalardyń oryndalýy jaıynda esep berip, 2018 jyldyń josparymen tanystyrdy.
KAZENERGY qaýymdastyǵy 9 negizgi baǵyt boıynsha jumys atqardy. Salyq jáne tarıfter, jer qoınaýyn paıdalaný, munaı ónimderi men suıytylǵan munaı gazynyń aınalymy, elektr energetıkasy, ekologıa, jergilikti úlesti damytý, tehnıkalyq retteý, adamı kapıtaldy damytý, halyqaralyq qyzmet jáne saraptama salalarynda oń nátıje bar.
«Usynylǵan quqyqtyq normalardy qaraý prosesinde Energetıka mınıstrliginiń jumys tobymen 120 otyrys ótkizildi, KAZENERGY tarapy belsene qatysty. Nátıjesinde engizilgen 300-den astam túzetýdiń 60%-dan astamy qoldaý tapty. 2017 jyly munaı ónimderi men suıytylǵan gazdyń baǵasyn belgileý máselesi jıi kóterildi. Qaýymdastyq qarjy shyǵynyn jáne munaı ónimderi naryǵy sýbektileriniń salyq aýyrtpalaǵyn azaıtý, sondaı-aq munaıdyń ishki jáne eksporttyq baǵasyn teńdestirý usynystaryn berdi», – dedi Áset Maǵaýov.
Sonymen qatar Keńes otyrysynda Qaýymdastyqtyń 2018 jylǵa arnalǵan búdjeti bekitildi.
