Búgin «Astana EKSPO-2017» UK» AQ Basqarma Tóraǵasy Erbol Shormanov Japonıanyń Qazaqstan Respýblıkasyndaǵy Tótenshe jáne Ókiletti Elshisi Itıro Kavabatamen kezdesý ótkizdi, dep Qamshy.kz aqparat agenttigi «Astana EKSPO-2017» UK» AQ Qoǵammen baılanys departamentine silteme jasap habarlaıdy.
Basqarma Tóraǵasy mártebeli meımanǵa kórme aıaqtalǵan soń, Ulttyq kompanıaǵa mindettelgen birqatar jumystar jóninde aıtyp berdi. Sondaı-aq, E.Shormanov 2017 jylǵy qarashanyń 10-nan bastap «Nur Álem» Ulttyq pavılony, Úzdik tájirbıeler aımaǵy, Energıa holy jáne Kongres ortalyǵynyń kelýshiler úshin qaıta iske qosylǵanyna da toqtaldy. Kezdesý barysynda «Astana» Halyqaralyq qarjy ortalyǵy, «Astana Hub» İT-startaptarynyń halyqaralyq tehnoparki, Jasyl tehnologıalar ortalyǵy jáne ózge de uıymdar jaıǵasatyn nysandarda qaıta jóndeý jumystary júrgizilip jatqany baıandaldy.
Erbol Shormanov Japonányń «Astana EKSPO-2017» kórmesine qatysqany úshin Itıro Kavabataǵa alǵysyn bildirdi.
«Japonıa kórmege qatysatynyn alǵashqy bolyp rastaǵan memleketterdiń qatarynda. Kórme kezinde Kúnshyǵys eliniń pavılony eń kóp tamashalanǵan «Úzdik 10» pavılon (700 myń adam tamashalaǵan) qatarynan oryn aldy. EKSPO-2017 barysynda, kórmege kelýshiler japon halqynyń mádenıetimen jáne dástúrimen etene tanysyp, jaryqdıody, baldyr bıomassasy jáne sýtekti energetıka salasyndaǵy sońǵy tehnologıalaryn tamashalady. Eń bastysy, eki eldiń bıznes ókilderi ózara baılanys ornatty», – dedi E.Shormanov.
Óz kezeginde Japonıa elshisi EKSPO-2017 kórmesiniń uıymdastyrylý deńgeıine joǵary baǵa berdi.
«EKSPO-2017 Halyqaralyq mamandandyrylǵan kórmesiniń ótkizilýi eki el arasyndaǵy dostyq qarym-qatynastyń nyǵaıýyna sep bolǵanyn úlken senimmen aıta alamyn», - dedi I.Kavabata.
Sondaı-aq, I.Kavabata myrza Japonıanyń Osako qalasynda EKSPO-2025 Búkilálemdik kórmesin ótkizý quqyǵyna ıe bolýy baǵytyndaǵy jumystardy ilgeriletýde ekenin tilge tıek etti.
Kezdesý sońynda Erbol Shormanov Itıro Kavabata myrzaǵa bólgen ýaqyty úshin alǵys aıtyp, Japonıa tarapynyń joǵary tehnologıalar men jasyl energetıka salasynda aldaǵy ýaqytta da birlesip jumys atqaratynyna senim bildirdi.
