2018 jyly 22 qańtarda Shymkent qalasynyń ákimi Nurlan Saýranbaev Ál-Farabı aýdanynyń ákimi Baýyrjan Qaljanovqa oryssha sóılemegeni úshin eskertý jasady. Onymen qoımaı, ózi qoıyrtpaq tilde sóılep, qatty synǵa ushyrady. Saýranbaevtyń bul áreketine qatysty Qamshy.kz aqparat agenttigi Shymkent qalasy ákimdigine resmı saýal joldady. Ázil-shyny aralas jazylǵan úshbý hat saıtymyzda da jarıalandy. Alaıda jaýap qatqan eshkim joq. Osyǵan oraı Ońtústik Qazaqstan oblysynyń ákimi Janseıit Túımebaevqa birneshe suraq qoıǵandy jón kórdik.

Qurmetti Janseıit Qanseıituly!

1. Nurlan Saýranbaevtyń til týraly sóılegen sózin oblys basshysy retinde siz qalaı túsindiresiz?
2. Saýranbaev oryssha sóılemegen aýdan ákimine kóptiń kózinshe eskertý jasady. Al memlekettik tildi qorlaǵan Saýranbaevqa qandaı da bir shara qoldanylǵanyn estimedik. Nege?
3. Nurlan Saýranbaevqa saýal joldaǵanymyzǵa bir aptadan asty. Áli jaýap kelgen joq. Bul Shymkent ákiminiń BAQ ókilderimen sanaspaǵany ma, álde qyzmetine salǵyrt qaraǵany ma?
4. Siz qazaq tiliniń bilgirisiz, kóptegen oqýlyqtyń avtorysyz. Fılologıa ǵylymdarynyń doktory, profesor retinde mundaı sheneýnikterdiń memlekettik qyzmette jumys isteýine qalaı qaraısyz?
5. Shymkenttiń burynǵy ákimi Ǵabıdolla Ábdirahymovtyń qyzmetten ketýin sizdiń taǵaıyndalýyńyzben baılanystyratyndar bar. Oblys ortalyǵynyń ákimin aýystyrýǵa ne sebep boldy?