Májilis Tóraǵasy Nurlan Nyǵmatýlınniń  tóraǵalyǵymen ótip jatqan Palatanyń kezekti jalpy otyrysynda komersıalyq emes uıymdardyń qyzmeti máselelerin túzetýge arnalǵan zań jobasy talqylandy, dep habarlaıdy Qamshy.kz aqparat agenttigi.

Talqylaý barysynda Májilis Spıkeri memlekettik áleýmettik tapsyrys standarttaryna aıryqsha nazar aýdardy.

Aýyldaǵy úkimettik emes uıymdar men qalalardaǵy uıymdar deńgeıiniń aıyrmashylyǵy bar ekenine kóńil bóle otyryp, Nyǵmatýlın arnaıy baıqaýlarda aýyldaǵy úkimettik emes uıymdardyń grantty da, memlekettik áleýmettik tapsyrysty da jeńip alýy qıyn ekenin alǵa tartty:

– Shynynda áleýmettik standarttar daıyndalǵan kezde mindetti túrde  aýyldyń jaǵdaıyn eskerý kerek.  Aýyl men qalanyń ózine tán erekshelikteri bar. Sol sebepti standarttardy engizgende osy erekshelikterge qaraı tıisti jaǵdaı jasaý qajet, – dedi.  

Bul zań jobasynyń maqsaty memlekettik áleýmettik tapsyrysty iske asyrýdyń tıimdiligi men ashyqtyǵyn arttyrý arqyly sol saladaǵy tıisti zańnamany jetildirý bolyp tabylady.