Búgin Qazaqstannyń halyq jazýshysy, tarıhshy,  fılologıa ǵylymdarynyń doktory Muhtar Maǵaýınniń týǵan kúni, dep habarlaıdy Qamshy.kz aqparat agenttigi. 

1940 jyly Shyǵys Qazaqstan oblysy Aıagóz aýdanynda týǵan qazaq halqynyń mańdaıyna bitken biregeı jazýshy bıyl jetpis segiz jasqa tolyp otyr.  

Muhtar Maǵaýın «Qazaq ádebıeti» gazetiniń bólim meńgerýshisi, «Jazýshy» baspasy, «Jalyn» jýrnaly bas redaktorlarynyń orynbasary, Ádebıet ınstıtýty jáne Qazaqstan Respýblıkasy Bilim jáne ǵylym mınıstrliginiń aǵa ǵylymı qyzmetkeri, Abaı atyndaǵy Qazaq ulttyq pedagogıkalyq ýnıversıtetiniń aǵa oqytýshysy, dosenti, «Jazýshy» baspasynyń, «Juldyz» jýrnalynyń bas redaktory qyzmetterin atqarǵan.

 «Keshqurym» atty alǵashqy áńgimesi 1964 jyly «Juldyz» jýrnalynda jarıalanǵan.

«Aqsha qar», «Bir atanyń balalary», «Qıandaǵy qystaý», «Kók kepter» povester men áńgimeler jınaqtarynyń, «Kók munar», «Shaqan sheri» romandardyń, «Alasapyran» roman-dılogıanyń, «Qobyz saryny» atty monografıanyń, «Ǵasyrlar bederi», «Qazaq tarıhynyń álippesi» ǵylymı-zertteý eńbekteriniń, «Qazaq handyǵy dáýirindegi ádebıet» oqýlyqtarynyń, hrestomatıa jáne basqa da oqý quraldarynyń avtory.

«Aldaspan», «Bes ǵasyr jyrlaıdy», «Aı zaman-aı, zaman-aı» aqyn-jyraý shyǵarmalary jınaqtarynyń antologıasyn qurastyrǵan.