Úndistannan týrısik sapardan oralǵan Almatynyń úsh turǵyny tyrysqaq dertine shaldyqqany anyqtaldy.

KTK arnasy qaýipti dert juqtyrǵandar aýrýhanada oqshaý orynǵa jatqyzylyp, dárigerlerdiń baqylaýyna alynǵanyn habarlady.

Týystarynyń aıtýynsha, qazaqstandyqtar bir aı buryn týrısik saparmen Úndistanǵa baryp, alty qalada bolǵan. Sapar kezinde bireýi ózin jaısyz sezinip, keıin densaýlyq jaǵdaıy turaqtalǵandaı bolǵan. Biraq Almatyǵa oralǵannan keıin taǵy nasharlap, qańtardyń 31-inde juqpaly dertten emdeıtin aýrýhanaǵa jatqyzylǵan.

"Almatylyqtar Úndistanda ártúrli astan jep, sý ishken. Dert ulýdan shıkileı jasalatyn taǵam jegende juqqan bolýy múmkin", - degen boljam aıtady Almaty qalasy qoǵamdyq densaýlyq saqtaý departamentiniń asa qaýipti juqpaly aýrýlardy epıdemologıalyq qadaǵalaý bólimi jetekshisi Saıat Qaýmetbaev.

Qazaqstandyq týrıserdiń qaýipti dert juqtyrǵany anyqtalǵannen keıin dárigerler olarmen baılanysta bolǵandardyń bárin – otbasy múshelerin, ushaqta birge kelgen jolaýshylar men ushaq ekıpajyn túgeldeı teksergen. Ázirshe ózgelerden dert belgileri anyqtalǵan joq dep habarlandy.

Dárigerlerdiń málimetinshe, ótken jylǵy qarasha-jeltoqsan aılarynda Almatyda Úndistannan kelgen bes adamnan tyrysqaq derti anyqtalǵan.