Qazaqstandyq júrgizýshi kýáligi shet memleketterde jaramsyz degen aqparat shyndyqqa janaspaıdy. Bul týraly İshki ister mınıstrligi ákimshilik polısıasynyń Almatydaǵy ókildigi málimdedi dep habarlaıdy "Astana" arnasy.

Jańa jyldan bastap "Halyqaralyq júrgizýshiler qaýymdastyǵy" dep atalatyn uıym qazaqstandyq júrgizý kýáliginiń keıbir shet elderde jaramsyz ekenin habarlap, ózdiginshe júrgizý kýálikterin tarata bastaǵan. Ásirese elden tysqary shyǵyp, saıahattaıtyn otandastarymyzǵa mundaı habar jaı túskendeı áser etken bolatyn.

Alǵashqy aqparat halyqaralyq júrgizýshiler qaýymdastyǵy dep atalatyn uıymnyń jeke saıtynda paıda boldy. Odan keıin birneshe resmı aqparattyq portaldarda halyqaralyq júrgizýshiler kýáligi týraly maqalalar basylyp shyqty. Aqparattyq lezdemege tereńirek úńilseńiz, endi Qazaqstanda beriletin júrgizýshiler kýáligi shet memleketterde jaramsyz degendi uǵynasyz, ıaǵnı Birikken Ulttar Uıymynyń Jol júrý týraly konvensıasyna 2011 jyly 29 naýryzda ózgeris engizilgen. Bul ózgeriske sáıkes ulttyq júrgizý kýálikterin elden tys aýmaqta paıdalanýǵa bolmaıdy.

"Birikken Ulttar Uıymynyń konvensıasyn negizge ala otyryp, halyqaralyq júrgizýshiler kýáligin berýdi qolǵa aldyq. Birikken Arab Ámirlikterine nemese Taılandqa saıahattap barsańyz, jalǵa kólik alý qıyndaıdy. Týrıser da qazaqstandyq júrgizý kýáliginiń jaramsyzdyǵyn aıtyp shaǵymdar túsire bastady. Sondyqtan biz osyndaı qujatty Birikken Ulttar Uıymynyń jarǵysyna sáıkes qalaǵan azamattarǵa jasap berip jatyrmyz", - deıdi Halyqaralyq júrgizýshiler qaýymdastyǵynyń bas mamany Erlan Ibraev.

Qaýymdastyq on kúnde 30-dan astam týrıske halyqaralyq júrgizý kýáligin berip úlgergen. Habarlasyp, sý jańa kýálik alýǵa asyqqandar jeterlik deıdi kompanıa ókilderi. Onyń quny shamamen 25 myń teńgege baǵalanǵan.

Tipti belgili jıhangez Dmıtrıı Petrýhın de atalǵan kýálikke jaqynda qol jetkizipti. Baıker mundaı qujat halyqaralyq tájirıbede keńinen qoldanylatynyn aıtady.

"Men, shyn máninde, osy qıyndyqqa tap boldym. Qytaı arqyly ótkende bizdiń eldiń júrgizýshi kýáligin moıyndamaı qoıdy. Olar tipti maǵan emtıhan tapsyryp, óz kýálikterin alýdy usyndy. Sol sıaqty Eýropa men arab elderinde de halyqaralyq júrgizý kýáligin suraǵanyn rastap beremin", - dedi baıker Dmıtrıı Petrýhın.

Alaıda júrgizý kýáligin berýge ókiletti İshki ister mınıstrligi ákimshilik polısıasy joǵarydaǵy mekemeniń áreketin zańsyz dep esepteıdi. Halyqaralyq júrgizý kýáligin berý "úı ishinen úı tikkenmen para-par" deıdi polısıa ókilderi. Qazaqstanda 2006 jyly jańa úlgide berile bastaǵan júrgizý kýáligi Birikken Ulttar Uıymynyń konvensıasyna sáıkestendirilgen.

"Qazaqstanda zańǵa sáıkes júrgizý kýáligin beretin jalǵyz organ ol - İshki ister mınıstrligi. Sol quzyrly organ bergen kýálik qana jaramdy. Basqa andaıda bir uıymnyń bergeni jaramsyz dep sanaımyz", - deıdi Almaty qalasy ÁPB emtıhan alý, tirkeý bólimi basshysynyń orynbasary Nurlan Amanbek.

İshki ister organdarynyń málimetinshe, Qazaqstandyq úlgidegi júrgizý kýáliginiń shetelderde jaramsyzdyǵyn aıtyp, shaǵymdanǵan derekter kezdespegen. Sondyqtan 9 jyldan beri berilip kelgen júrgizý kýáligi halyqaralyq talaptarǵa jaýap beredi. Al naýryzdyń birinen bastap elimizde jolda júrý kýáligi taǵy da jańarady. İshki ister mınıstrligi Kólik túrlerin júrgizýge qosymsha sanattar engizilgen jańa qujatpen de qazaqstandyqtar shet memleketterde kedergisiz júredi dep sendirdi. Derekkóz: "Astana" arnasy