Premer-mınıstr Baqytjan Saǵyntaev úkimettiń keńeıtilgen otyrysynda QR Prezıdenti alǵa qoıǵan mindetterdi oryndaý boıynsha Úkimet otyrysyn ótkizdi, dep habarlady Qamshy.kz aqparat agenttigi Primeminister.kz saıtyna silteme jasaı otyryp. Saǵyntaevtyń tóraǵalyǵymen ótken Úkimet otyrysynda Memleket basshysynyń 2018 jyldyń 9 aqpanyndaǵy Úkimettiń keńeıtilgen otyrysynda bergen tapsyrmalaryn oryndaý sharalary qaraldy.

Otyrys barysynda qarjy mınıstri Sultanovtyń, ulttyq ekonomıka mınıstri Súleımenovtiń, ınvestısıalar jáne damý mınıstri Qasymbektiń, energetıka mınıstri Bozymbaevtyń, aqparat jáne komýnıkasıalar mınıstri Abaevtyń, densaýlyq saqtaý mınıstri Birtanovtyń, bilim berý mınıstri Saǵadıevtiń Úkimettiń keńeıtilgen otyrysynda Memleket basshysy qoıǵan mindetterdi oryndaý máseleleri jónindegi esepteri tyńdaldy.

Sondaı-aq, talqylaýǵa Ulttyq bank tóraǵasy Aqyshev, QR premer-mınıstriniń birinshi orynbasary Mamın, QR premer-mınıstriniń orynbasarlary Shókeev, Dosaev, Jumaǵalıev jáne "Atameken" UKP basqarma tóraǵasy Myrzahmetov qatysty. Otyrys qorytyndysy boıynsha Premer-mınıstr Baqytjan Saǵyntaev memlekettik organdardyń ár basshysynyń jeke jaýapkershiligin atap ótip, naqty tapsyrmalar berdi.

Eske sala keteıik, keshe, 9 aqpanda Aqordada Qazaqstan Respýblıkasynyń Prezıdenti Nursultan Nazarbaevtyń qatysýymen Úkimettiń keńeıtilgen otyrysy ótti. Otyrysta Nazarbaev eńbek jáne halyqty áleýmettik qorǵaý mınıstri Tamara Dúısenovaǵa mindetti áleýmettik medısınalyq saqtandyrýdy engizý máselesine qatysty syn aıtqan bolatyn. Dál osy kúni Mádına Ábilqasymova eńbek jáne halyqty áleýmettik qorǵaý mınıstri bolyp taǵaıyndaldy.