Ánshi Meırambek Besbaev Instagram jelisindegi paraqshasynda marqum bolǵan aqyn Esenqul Jaqypbek týraly esteligimen bólisti.
«Men Esaǵamdy bala kezimnen bilýshi edim. Shorabek, Ázimbek aǵalarmen aıtysyp júrgen kezderinde, men dombyramdy arqalap baryp án salyp, sol kezdegi aıtystyń ýytty ázilderin jattap alatynmyn.Ýaqyt óte kele aǵammen jaqyn aralaspasam da, jaqsy kórip, qurmettep, óleńderin oqyp, ánderin tyńdap júretinmin. Sodan maǵan Esenqul aǵammen júzdesýdiń sáti tústi. Bizdi tanystyrǵan, tabystyrǵan aǵamnyń «Ómir ótti…» atty óleńi edi. Bul óleńge án jazylyp, meniń aıtýym bir Allanyń qalaýy dep bilemin. Áıtpese ol ánge talasqan biraz ánshiler boldy. Biraq ol án maǵan buıyrdy. Osy óleńge án jazyp, jasatyp kórgennen soń ishindegi biraz jerine Esaǵama túzetý engizip berýin ótinip, habarlastym. Esenqul aǵam meniń bul usynysymdy qup kórip, Almatyda kezdeseıik dedi. Almatyda kezdesip, shaı ústinde otyryp ol kisi ánniń:
«Eski dospen kezdeskende,
Esim shyǵyp, shyn qýanyp…
Qaıran ómir sonsha súıgen,
Ketesiń-aý, bir kúni aýyp…», – degen joldaryn shyǵaryp berdi», – dep jazdy halyqtyń súıiktisi.
Ánshiniń aıtýynsha, sózi men sazy úılesken ándi halyq jaqsy qabyldap, aqynnyń ózi de rıza bolǵan eken.
«Biraz ýaqyt ótkennen keıin Esaǵamnyń Almaty qalasynda Áýezov atyndaǵy drama teatrynda «Kúpáıke kıgen poezıa» degen atpen shyǵarmashylyq keshi ótti. Sol keshte men «Ómir ótti zyrǵyp aǵyp» óleńin aıtyp berdim. Bul óleń sátti shyqty dep oılaımyn. Halyq jaqsy qabyldady. Esaǵam da máz bolyp, betimnen súıip, baýyryna basyp alǵysyn aıtty. Sol keshke daıyndalyp júrgende men aǵama aıtystarynan úzindi aıtyp, óleńderin oqyp bergenimde Esaǵam qýanyp: «Meırambek, sen tek ánshi ǵana emes, aqyn ekensiń. Sen meniń biraz óleńimdi bilgenińe shyn qýanyp otyrmyn!» – dep biraz ótken-ketken kúnderden estelikterin aıtyp, arqa-jarqa bolyp qaıtqan edik. Sol keshti ótkizgen soń men Esaǵammen ýaqyttyń tyǵyzdyǵyna baılanysty kóp kezdese almaı júrdim. Keıinnen 31 arnada «Aıtylmaǵan áńgime» baǵdarlamasynda aǵamyzdyń 60 jyldyǵyna oraı úlken baǵdarlama túsirildi. Stýdıaǵa baryp «Ómir ótti…» ánin oryndap, Esaǵamyz týraly azdy-kópti biletin oqıǵalardy aıtyp berdim. Sol kezde de aǵam máz bolyp, qushaqtap, mańdaıymnan ıiskep ákelik alǵysyn aıtyp, batasyn berdi», – deıdi ánshi.
Alaıda dál osy sońǵy kezdesýde Esenqul Jaqypbek Meırambek Besbaevpen qımaı qoshtasypty.
«Sol kún meniń Esaǵammen kezdesetin sońǵy kún ekenin kim bilgen? Sońǵy ret sol keshte ol kisi menimen qımastyqpen qoshtasqandaı boldy. Men aǵamnyń alǵysyn alyp, óz jumystarymmen kete berdim. Al Esaǵa elge ketti. Elge ketken kúnniń ertesinde «Esaǵa qaıtys bolypty» degen sýyq habar jetti. Túnde ǵana áńgimesin aıtyp, baýyryna basyp otyrǵan aǵamnyń tańǵa jýyq júregi toqtaıtynyn kim bilgen? Mereıtoıyńa baryp quttyqtaý tilek aıtamyz dep júrgende, janazańa baryp sapqa turyp qaldyq-aý. Qaıran ómir sonsha súıgen, ketesiń aý bir kún aýyp degenińizdi rastap kete bardyńyz. Ómir ótti zyrǵyp aǵyp degen osy shyǵar. Jatqan jerińiz jaryq bolsyn aǵa! Janyńyz jánnatta bolsyn! Alla aldyńyzdan jarylqasyn!» – dep jazdy Meırambek Besbaev.
Pikir qaldyrý