Máskeý túbinde apatqa ushyraǵan An-148 ushaǵynda bolǵan barlyq jolaýshylar men ekıpaj músheleriniń aty-jóni anyqtaldy dep habarlaıdy Qamshy.kz aqparat agenttigi. Apattan japa shekkenderdiń tizimi Reseı Federasıasy Tótenshe jaǵdaılar mınıstrliginiń resmı saıtyna jarıalandy. Ajal qushqan jolaýshylardyń úsheýi — balalar.  

Eske salsaq, Máskeýdiń Domodedovo áýejaıynan kókke kóterilgen An-148 jolaýshylar ushaǵy kóp uzamaı radardan joǵalyp ketti. Keıin ushaq qaldyqtary Máskeý oblysynyń Ramensk aýdanynda tabylǵany anyqtaldy.  «Saratov áýe jelileri» kompanıasyna tıesili ushaqtyń bortynda 65 jolaýshy men 6 ekıpaj múshesi bolǵan. Olardyń barlyǵy qaza tapty.  

Ázirge apatqa ne sebep bolǵany týraly resmı derek joq. Tergeý komıtetiniń aıtýynsha,  qaıǵyly oqıǵa aýa raıynyń nasharlaýy, ekıpajdyń qateligi, sondaı-aq tehnıkalyq aqaý saldarynan bolýy múmkin. Oqıǵa ornynan bir qara jáshik tabyldy. Tergeý men qutqarý jumystary áli jalǵasýda. 

Reseı prezıdenti Vladımır Pýtın adamdardyń qaza bolýyna oraı kóńil aıtyp, úkimettik komısıa qurýdy tapsyrdy.   

Qazaqstannyń Syrtqy ister mınıstrligi qaza bolǵandardyń arasynda elimiz azamattarynyń bar-joǵyn anyqtaýda.