10 aqpanda Shymkent qalasy Qaınar bulaq saıajaıynda №83 mekteptiń oqýshysy asylyp qaldy. Balanyń óli denesin ata-anasy taýyp alǵan. Biraz ýaqyttan keıin qaıtys bolǵan balanyń qaltasynan birneshe adamnyń aty-jóni jazylǵan hat tabyldy dep jazady Qamshy.kz aqparat agenttigi otyrar.kz saıtynyń deregin nazarǵa ala otyryp. Bul hat jyrtylyp qalypty.

Mektep qyzmetkerleri men kórshiler de 16 jastaǵy jasóspirim týraly jaqsy pikir bildirdi.

Joǵary synyp oqýshysynyń anasy ulynyń kóńil-kúıi túskenin baıqaǵan. Alaıda testti oıdaǵydaı tapsyra almaýy sebep bolǵan shyǵar dep asa mán bere qoımapty.

«Ol ádettegideı úıge kelip shaı ishkisi keletinin aıtty. Ol belgisiz bir testti tapsyrǵysy kelgen. Biraq onyń 500 teńgesi bolmaǵandyqtan, ony qabyldamapty. Men onyń yzalanyp, ári renjip turǵanyn baıqadym. Ulym aýlaǵa shyǵyp ketti, al men dastarhan jaıyp, shaıdyń qamyn jasap jatqan edim. Bul shamamen keshke jaqyn boldy. Men ulymdy shaı ishýge shaqyraıyn dep aýlaǵa shyqsam, ol joq eken. Ony izdep monshaǵa barsam, ol asylyp qalǵan...», dep aǵyl-tegil jylady anasy Fatıma. 

Jasóspirimniń anasynyń aıtýynsha uly sol kúni ápkesine habarlasyp, 7000 teńge suraǵan. Sebebi oǵan joǵary synyp oqýshylary kún bermegen.

Jyrtylǵan hatty ulynyń qaltasynan anasy tapqan. Týysqandarynyń aıtýynsha, bul hatty polısıa qyzmetkerleri alyp ketken. Fatıma bul hat ulynyń óler aldyndaǵy sońǵy haty ekenine senimdi.

«Men bul oqıǵa týraly estigen boıda mektep oqýshysynyń úıine bardym. Bul barlyǵymyzǵa aýyr soqqy boldy. Men ne bolǵanyn áli kúnge deıin túsinbeı otyrmyn. Ózim jumys isteıtin mekteptiń oqýshylary osyndaı jaǵdaıǵa tap boldy degenge sene almaımyn. Mektepte joǵary synyp oqýshylarynyń arasynda aqsha jınaý oqıǵasy buryn bolmaǵandyqtan, olar asa qatty baqylaýǵa alynbady. Keshe qaıtys bolǵan oqýshynyń synyptastaryn jınap, bul oqıǵa týraly ne biletinderin suradym. Alaıda olar eshteńe bilmeıtinin aıtty», deıdi mektep dırektory Berikbaı Mıheev.

16 jastaǵy oqýshynyń ata-anasy jyrtylǵan hattaǵy aty-jóni jazylǵan adamdardy tapqysy keledi jáne ulynyń ólimine olardyń qandaı da bir qatysy bar ekenine senimdi. Al Qaınar-bulaq turǵyndary qyrshynnan qıylǵan jigitti janaza namazynan keıin  jer qoınyna tapsyrdy.