Moldova kásipkeri Anatolıı Statıdiń aıtýynsha, Ulttyq qordaǵy 28 mıllıard dollar Qazaqstanǵa áli de qoljetimsiz kúıde qala beredi.

Ulttyq qordyń $22.6 mıllıard qarjysy Amsterdam sotynyń qarajatty bosatý týraly sheshimine qaramastan, áli de buǵattaýly jatyr. Bul jaıynda Qamshy.kz aqparat agenttigi Prnewswire.com saıtyna silteme jasap habarlaıdy.

Kásipker Anatolıı Statıdiń sózinshe, Amsterdam aýdandyq sotynyń qaýlysy buǵattan shyǵarýǵa áser etken joq, sebebi shara Brússeldegi Birinshi Assambleıa sotynyń sheshimine sáıkes engizilgen. Bul sheshim osy zań ınstıtýtynda tergeý jumystary aıaqtalǵanǵa deıin kúshinde bolady.

Derekkózde kórsetilgendeı, Brússel sotynyń sheshimi – 2017 jyldyń tamyz aıynda bastalǵan ártúrli eýropalyq sot sheshimderiniń biri. Sonyń nátıjesinde Statı partıasy Nıderlandy, Belgıa, Shvesıa jáne Lúksembýrgte $28 mıllıard qazaqstandyq múlikti buǵattap tastady.

Esterińizge sala keteıik, 2018 jyldyń 23 qańtarynda Amsterdam aýdandyq soty Nú-Iork Mellon Bankindegi Ulttyq qordyń aktıvterin buǵattan shyǵarý týraly Ulttyq banktiń ótinishin maquldaǵan bolatyn. Sonymen qatar Ádilet mınıstrligi Ulttyq qordyń aktıvteriniń bir bóligi buǵattaýly kúıinde qalatynyn málimdegen.

Odan buryn, 2017 jyldyń jeltoqsanynda Nú-Iork Mellon banki Ulttyq qordyń $22 mıllıard qarjysyn buǵattap tastaǵan bolatyn.

Keıinirek Statı kompanıasynyń ókili shyǵyndardy óteý úshin «Samuryq-Qazynany» Qashaǵan ken ornyndaǵy úlesin satýǵa mindetteýdi Golandıa sotynan suraýǵa nıetti ekenin aıtty. Tergeý jumystary birneshe jyldan beri júrip jatyr. Shaǵymdardyń jalpy somasy $4 mıllıardtan asady.

Ulttyq qor «Samuryq-Qazynaǵa» tıesili Qashaǵan ken orny satylmaıdy dedi. Ádilet mınıstrligi Statıdiń talabyn tym agressıvti propaganda dep atady. Ádilet mınıstri Ádilet Beketaev óz kezeginde moldovalyqtyń Qazaqstandy $167 mıllıon shyǵynǵa ushyratqanyn aıtty.