Almaty oblysynyń Kásipkerler palatasy jáne Didakt-kz kásibı baǵyt-baǵdar berý jáne mansapty josparlaý ortalyǵy «H adamdar: Mamandyqtar álemine saıahat» atty aýqymdy kvest oıynyn uıymdastyrdy. Bıyl kásibı baǵdar berý is-sharasy Taldyqorǵan qalasynyń Oqýshylar saraıynda ótti.

Kvest oıyny ár túrli mamandyqtardan quralatyn 10 ınteraktıvti stansadan turady. Beketterde oqýshylar stansanyń atyn ǵana emes, mamandyqqa qatysty kúrdeli tapsyrmalardy oryndaýy tıis. Sharaǵa Taldyqorǵan qalasynyń 60-tan astam oqýshy qatysty.

«Ótken jyldan beri kásibı baǵyt berý jumysyn jańasha formatqa aýystyrdyq. Mamandyqtar boıynsha dáristerdi qoıa turyp, oqýshylar úshin tanymdyq kvest oıynyn oılap taptyq. Balalar tájirıbe júzinde qarapaıym kásibı qabiletterdi boılarynda shyńdaýyna múmkindik beredi. Sharamyzǵa qalanyń jalpy bilim beretin mektepterinen 9 top qatysty», -  deıdi Almaty oblysy Kásipkerler palatasy adamı kapıtaldy damytý bóliminiń sarapshysy Ardaq Qashqarova.

Qatysýshylarǵa arnalǵan beketterdi qurastyrýǵa Almaty oblysynyń Tótenshe jaǵdaılar jónindegi departamenti, №54380 áskerı bólimi, Ó. Joldasbekov atyndaǵy ekonomıka jáne quqyq akademıasy, «Bilim» koleji, Taldyqorǵan ónerkásiptik ındýstrıa jáne jańa tehnologıalar koleji, servıs jáne tehnologıalar koleji, agrotehnıkalyq koleji, gýmanıtarly-tehnıkalyq koleji, medısınalyq koleji jáne polıtehnıkalyq koleji qatysty.

Stansalarda balalardyń jyldamdyǵy, eptiligi men dáldigi sarapqa salyndy. Máselen, «Quryshtan jasalǵandar» atty bekette qurastylyrymdardy is júzinde kúıdirip, dánekerleýshi mamandyǵy boıynsha suraqtarǵa jaýap berý kerek boldy. Al «Qaınar Qurylys» beketinde qatysýshylar daıyndalǵan úı maketin bólshektep, keıin qaıta qurastyrdy.

«Bul shara oń áser men jarqyn sezimder syılady. Oıyn bolǵanyna qaramastan, kópshiligimiz úshin bolashaq mamandyǵymyzdy tańdaýǵa óz kómegin tıgizdi», - deıdi №9 orta mektep oqýshysy Arýjan Qadyr.

Kvest oıyny qorytyndysy boıynsha birinshi oryndy №9 mektep ıelense, ekinshi jáne úshinshi oryndardy №12 men №17 mektepter bólisti. Jeńimpazdarǵa sertıfıkattar men estelik syılyqtar tabystaldy. Olar óz kezeginde jalpy oıynnyń fınalyna joldama alady.

«Balalardyń kózderinen úlken qyzyǵýshylyq men jańa bastamalarǵa degen qulyshynysty baıqadyq. Bastysy, oqýshylar baqylaýshy emes, belsendi qatysýshy retinde tanyldy, top úshin ózderiniń úlesin qosty. Bizdiń balalar ómirdegi eń negizgi - bolashaq mamandyq tańdaýdy jasaı bilýi tıis», - dep qosty Didakt-kz kásibı baǵyt-baǵdar berý jáne mansapty josparlaý ortalyǵynyń jetekshisi Gúlbaram Adambaeva.

Uıymdastyrýshylardyń sózinshe, aldaǵy ýaqytta «H adamdar: Mamandyqtar álemine saıahat» kvest oıynynyń qosymsha eki irikteý oıyny ótedi. Jeńimpazdar oıynnyń fınalyna qatysa alady.