Ertede bir boıdaq jigit júzinen nury tógilgen ımandy ári sulý qyzǵa kózi túsip, sońynan qalmaı júrip, ata-anasynyń aldynan ótedi. «Buıryq bolsa baǵyn baılamaıyq» degen ata-anasy da razylyǵyn berip, aq nekelerin qıady. Arada birneshe kún ótedi. Bir kúni keshkisin áıeli kúıeýine:
– Ekeýmiz jarysaıyqshy, – dep qolqa salady. 
Tańdanǵan kúıeýi: 
– Qalaı, neden jarysamyz? – deıdi. 
Kelinshegi:
– Quran jattaýdan, – dep jaýap beredi. 
Sonymen kelisip, ekeýi Quran jattaýdan jarysa bastaıdy. Kúnder syrǵyp, jyldar jyljyp óte beredi. Arada birshama ýaqyt ótkende jigit aq nekeli jaryn Quran jattaýdan basyp ozady. Munysyna marqaıyp, qatty qýanǵan ol bir kúni ata-enesine qonaqqa baryp otyryp, áńgime arasynda: 
– Bilesizder me? Biz qyzdaryńyz ekeýimiz Quran jattaýdan jarysyp edik. Arada eki jyl ótkende men Qurandy tolyǵymen jattap qarı boldym. Qyzdaryńyzdy basyp ozyp, jeńimpaz atandym! – deıdi marqaıyp. 
Bul sózderdi estigen ata-enesi ań-tań bolyp, bir-birine qarasady. Enesi: 
– Balam-aý, bizdiń qyzymyz Quran Kárimdi 9 jasynda jattap alǵan. Sen muny bilmeýshi me ediń? – deıdi. 
Muny estip qaıran bolǵan jigit áıeline kelip, onyń muny osynsha ýaqyt nege jasyryp júrgendigin suraıdy. Sonda parasatty kelinshek: 
– Men sizben tanysqanda siz Allany tanyǵanyńyzben, Onyń sózinen de, Ózinen de alystaý jigit edińiz. Sondyqtan sizge turmysqa shyǵyp, Allanyń sózi bolǵan Qurandy úıretkim keldi. Alla jazsa, Jánnatta sizben bir deńgeıde bolýdy qaladym... – dep jaýap bergen eken.

Ashyq derekkózden alyndy