2017 jyly 25 jeltoqsanda Alashordanyń qurylǵanyna  100 jyl tolýyna oraı  Qamshy.kz aqparat agenttigi  ıgi jaqsylardyń basyn qosyp, «Alash arystarynyń 100 izbasaryn» marapattaǵan bolatyn.

Osy keshte belgili qoǵam qaıratkeri, saıasatker Serikbolsyn Ábdildin Alash izbasarlarynyń atynan óziniń yqylasyn bildirdi.

- Eń birinshi jastarǵa ózimniń sezimim, senimim týraly aıtqym keledi. Alashtyń kósemderi bilimdi adamdar boldy. Qaı ýaqytta bolsyn, bilimniń joly myqty ekenin túsiný kerek. 100 jyl buryn bolǵan oqıǵa qazir jastar tarapynan qaıtadan kóterilip, nasıhattalyp jatqany, rýhanı kúsh úshin qoldanylyp jatqany  qasıetti dep esepteımin. Biz talaı  qıyndyqtar men joldardan óttik. Kezinde «Lenın joly» bolsa, endi «Nurly jol» bolyp jatyr. Keleshekte Qazaqstannyń joly «Alash joly» bolsa degen yqylasym bar. Alash joly memleketti kúsheıtýdiń ǵana joly emes. «Alash joly» – ádilet joly. Ol – bilimniń joly, rýhanı kúsh beretin jol, – deıdi Serikbolsyn Ábdildın. 

— Qazaqstanda Alashordanyń 100 jyldyǵy óz deńgeıinde toılanyp jatyr ma?

— Alashordanyń 100 jyldyǵyn biz táýelsizdik alǵannan bastap osy ýaqytqa deıin jaqsylap ótkizýimiz kerek edi. 25 jyldyń ishinde Alash týraly kóp maǵlumat taratýymyz kerek edi. Al 100 jyldyǵyna oraı memleket tarapynan úlken toı uıymdastyrylýy kerek edi. Toı dep turǵanym úlken dastarhan jaıý emes. Qazaqstan azamattaryna Alash dámin tatqyzyp, Alash qozǵalysynyń mańyzyn sezdiretindeı shara jasalýy kerek edi. Ókinishtisi, halqymyz mundaı maǵlumattardy ala alǵan joq.

— Jastarǵa Alash rýhyn nasıhattaý úshin qandaı qadamdar jasaýymyz kerek dep oılaısyz?

— Eń birinshi qadam – qazaqtyń rýhanı kúshin bıik ustaýymyz kerek. Ekinshiden, myqty el bolý úshin jaqsy bilim alýymyz kerek. Úshinshiden, biz myqty qazaq memelketin qurýmyz úshin basqalarǵa eliktep, jaltaqtaýymyzdyń keregi joq. Sebebi qazaqta rýh ta, kúsh te bar. Tek birlik kerek. Qazaq birikse boldy, jerdiń asty da, ústi de baılyqqa toly.

Memleket qaıratkeri Serikbolsyn Ábdildın – táýelsiz Qazaqstandaǵy Komýnıstik partıanyń alǵashqy hatshysy. Ol  QazKSR Joǵarǵy Keńesiniń on birinshi shaqyrylymynyń depýtaty, QazKSR Joǵarǵy Keńesiniń tóraǵasynyń orynbasary, QazKSR Joǵarǵy Keńesiniń tóraǵasy, Qazaqstan Respýblıkasynyń Parlament májilisiniń depýtaty qyzmetterin atqarǵan. 11-ge jýyq ǵylymı eńbek pen 6 monografıanyń avtory.