Óskemendegi «Halıfa Altaı» meshitiniń bas ımamy Gollıvýd akterlarynyń meshitke kirgenine qatysty túsinikteme berdi, dep habarlaıdy Qamshy.kz aqparat agenttigi. 

Jaqynda Gollıvýd juldyzdary Erık Roberts, Baı Lın, Mark Dakaskos jáne Kerı-Hıroıýkı Tagava derekti fılmge túsý úshin SHQO-ǵa bardy. Akterlardyń «Halıfa Altaı» meshitindegi fotosýretteri qoǵamda túrli pikir týǵyzdy. Áleýmettik jeli qoldanýshylary ózge din ókilderiniń musylmansha qol jaıǵanyn talqyǵa saldy. Ásirese, ashyq-shashyq kıinetin, fılmderge jalańash túsetin Baı Lınniń meshitke kirgenine narazylyq tanytty.

Osyǵan baılanysty Qamshy.kz aqparat agenttigi «Halıfa Altaı» meshitiniń bas ımamy Ermek Muqataımen sóılesti.

Ermek Muqataı: Meshittiń esigi bárine ashyq. Meshit tek ǵıbadat orny emes, ol – qoǵamdyq, rýhanı oryn. Kim kóremin, aralaımyn dese de, óz erki. Qonaqtarǵa qalany aralatý osy meshitten bastaldy. Gollıvýd akterlaryn biz shaqyrǵan joqpyz, olar bizge qonaq bolyp kele jatyr dep habarlandy.

Olar keldi, kórdi, aralady. Allanyń úıine qurmet kórsetti. Mysaly, Kerı Tagava meshitke kirerde bas ıip sálem berdi, shyǵarda da taǵzym etip qoshtasty.

Erık Roberts jaqynda jol apatyna ushyrapty. Ol kisige kóp qımyldaýǵa bolmaıdy eken. Soǵan qaramastan, arbasynan túsip, tizerlep otyryp qolyn jaıdy.

Kim biledi, keıbiri osydan keıin Islam dinin qabyldaýy múmkin. Baı Lın óz elinde pornojuldyz shyǵar, biraq meshitke ashyq-shashyq kelgen joq qoı. Jabyq kıingen, basyn búrkegen.

Qamshy.kz: Shashy kórinip tur ǵoı...

Ermek Muqataı: Kórine bersin. Eń bastysy, basy jabyq. Kim bolsa da kelsin, kórsin. Óz otandastarymyz da meshitke kelgende bastaryna bir japyraq oramaldaryn jaýyp otyra beredi.

Qamshy.kz: «Baı Lın meshitte býddızm rásimin jasady» dep aıyptap jatqandar bar. Buǵan ne deısiz?

Ermek Muqataı: Onda turǵan eshteńe joq. Ol ımamdarmen amandasyp, óz qurmetin kórsetti. Paıǵambarymyz kezinde hrıstıan áleminiń kóshbasshylaryn kútip alǵan. Olardyń úıine kirip, qal-jaǵdaılaryn suraǵan. Qazir rýhanı jańǵyramyz deımiz de, tar sheńberde oılaımyz. Bul – álemdik tájirıbede bar nárse. Ystambuldaǵy záýlim-záýlim meshitterdi dinine qaramaı, barlyǵy aralaıdy.

Qamshy.kz: Álemdik tájirıbe demekshi, Facebook paraqshasynda bir kisi: «Arabıadaǵy Mekkege pornojuldyz túgili ózge dindegi adamdy kirgizbeıdi. Al qazaqtyń meshiti «prohodnoı dvor» sıaqty, endi álemdi shýlatqan pornojuldyzdyń meshit tórinde taırańdaýy qalyp edi»,- dep otyr.

Ermek Muqataı: Mekke – qasıetti oryn.

Qamshy.kz: Bizdiń meshitter she?

Ermek Muqataı: Aıyrmashylyǵy jer men kókteı. Ol jerdiń bir qumyrsqasyn, bir shybynyn óltirýge bolmaıdy.

Meshitke ózgelerdiń kirýine tyıym salyp tastasaq, dinimizdi qalaı jetkizemiz? Onymen sóılespeı, suhbattaspaı, «sen kúnaharsyń» dep at-tonymyzdy ala qashsaq, durys bolmaıdy ǵoı.

Aıtpaqshy, «akterlar meshitke aıaq kıimmen kirdi» dep syn aıtyp jatqandar bar. Biz olarǵa arnaıy aıaq kıim daıyndaǵanbyz. Sony kıdi. Imamdar aqymaq emes. Pana izdep kelgen adamnyń bárine meshittiń esigi ashyq.

Qamshy.kz: Áńgimeńizge raqmet!