MS Saılaýbektiń esimin oqý quralyna engizgen avtor óz qatesin moıyndap otyr, dep habarlaıdy Qamshy.kz aqparat agenttigi.

Áleýmettik jeli qoldanýshylary qazaq tiline arnalǵan test jınaǵynda MS Saılaýbek týraly jazylǵanyna narazylyq bildirip jatyr.

Qamshy.kz aqparat agenttigi kitap avtorlarynyń biri Qazbek Saǵıdoldamen sóılesip, mán-jaıdy bilgen edi. Qurastyrýshynyń sózinshe, reperdiń esimi kitapqa baıqaýsyzda enip ketken.

– Bul negizi daıyndyqqa arnalǵan mátin edi. Al mátinderdi biz ártúrli ortalyqtan jınap, baspaǵa jiberemiz. Sonda daıyndyqqa arnalǵan mátinniń bir bóligin jibergenimizde materıaldyq bazadaǵy osy mátin de ketip qalypty. Ony kitap shyqqan soń biraq baıqadyq. Bul jaǵdaıdan keıin qatemizdi eskerip, kelesi basylymnan Saılaýbek týraly málimetti alyp tastadyq, – dedi qazaq tili pániniń muǵalimi.

Ol MS Saılaýbekti kitapqa sanaly túrde qospaǵanyn aıtyp, halyqtan keshirim surady.

– Bizdiń maqsatymyz – Saılaýbekti nasıhattaý emes, oqýshylardy daıyndaý. Byltyr shyǵarǵanymyzda mundaı bolmaǵan edi, bıyl keleńsiz jaǵdaıǵa tap boldyq. Óz qatemizdi moıyndaımyz. Bul oqý quralynda qamtylǵan 400 suraqtyń biri ǵana bolsa da, keshirim suraımyz. Elden bıik emespiz, - dedi Qazbek Saǵıdolda.

Nazarbaev zıatkerlik mektebine túsýshilerge arnalǵan bul test jınaǵy 2018 jyldyń basynda 100 dana bolyp shyqqan eken. Al Saılaýbekke qatysty mátinniń qaı ortalyqtan alynǵany belgisiz.