19 aqpanda AIBA akademıasynda ótken Qazaqstan jáne Ózbekstan quramalary arasyndaǵy kezdesýde Myrzaǵalı Aıtjanovtyń shákirtteri 6:4 esebimen jeńiske jetti. Qazaqstandyq boks chempıony Danıar Eleýsinov sýdıa sheshimimen ózbekstandyq Boboýsmon Batýrovtan ústem tústi, dep habarlaıdy Qamshy.kz aqparat agenttigi.

Rıo-de Janeıroda ótken Olımpıadadan keıin ekinshi ret jekpe-jekke shyǵyp turǵan Eleýsinov daıyndyǵynyń az bolǵanyn aıtty.

–Qarsylasym – myqty boksshy. Halyqaralyq olımpıadalarda boı kórsetip júrgen jigit. Ekeýmizdiń jekpe-jegimiz ońaıǵa soqqan joq.  Ózim jekpe-jekke 100 paıyz daıyndaldym dep aıta almaımyn. Bul Olımpıadadan keıingi ekinshi judyryqtasýym. Rıngke shyqpaǵanymdy eskersek, búgingi jekpe-jek qanaǵattandyrarlyqtaı boldy dep oılaımyn, - dedi boksshy.

Sonymen qatar, aldaǵy josparlarymen de bólisti.

–Biz Azıa oıyndaryna daıyndalyp jatyrmyz. Basty mindet – jeńiske jetý, - dedi Danıar Eleýsinov.

Eleýsinov qazirgi tańda Qazaqstan quramasynyń atynan jarystarǵa shyǵýǵa daıyndalyp júr. Al naýryzdyń basynda qazaqstandyq boksshylar Polsha men Fınlándıadaǵy týrnırge attanady.