Astanada «Eýropalyq Odaq – Qazaqstan: shırek ǵasyr yntymaqtastyq» derekti fılmi kórsetildi, dep jazady Qamshy.kz aqparat agenttigi.
Búgin Eýropalyq Odaq pen Qazaqstan Respýblıkasy arasyndaǵy dıplomatıalyq qarym-qatynastardyń 25-jyldyǵyna oraı «Eýropalyq Odaq – Qazaqstan: shırek ǵasyr yntymaqtastyq» derekti fılminiń kórsetilimi ótti. Derekti fılm Qazaqstandaǵy EO Ókildigimen QR Syrtqy ister mınıstrliginiń jáne Eýropalyq syrtqy ister qyzmetiniń qoldaýymen memlekettik tilde daıyndaldy.
Derekti fılmde yntymaqtastyqtyń shırek ǵasyrlyq tarıhy basty oqıǵalar tizbegimen baıandalady. Atap aıtqanda Qazaqstan syrtqy saıasatynyń qalyptasýy, alǵash eýropalyq ınvestısıalardyń kelýi, «Eýropaǵa jol» baǵdarlamasy, qaýipsizdik, ekonomıka, bilim berý, mádenıet salasynda seriktestiktiń damýy, Keńeıtilgen áriptestik pen yntymaqtastyq týraly kelisimge qol qoıý, Eýroodaqtyń Ortalyq Azıa boıynsha jańa strategıasyn ázirleý.
Kórsetilim aldynda baspasóz konferensıasy ótip, Qazaqstandaǵy EO Elshisi Traıan Hrıstea, QR Syrtqy ister mınıstriniń orynbasary Roman Vasılenko, 2001-2003 jj. Belgıa Koróldigindegi Qazaqstan Respýblıkasy Elshisi, tuńǵysh QR Syrtqy ister mınıstri Tóleýtaı Súleımenov sóz sóıledi.
Qazaqstandaǵy EO Elshisi Traıan Hrıstea: "Biz dúrbeleń geosaıası ózgerister men jalpy adamzat qundylyqtary shetkeri bolyp nemese umytylyp jatqan álem zamandastarymyz. Sondyqtan qatynastarymyzdyń shırek ǵasyr tarıhy ortaq qundylyqtar men múddelerge negizdelgen ekijaqty qarym-qatynastardyń aldaǵy kóptegen jyldary úshin mańyzdy tuǵyrnamasy bolatynyna senimdimin", - dep atap ótti.
Fılmniń negizinde - Eýropalyq Komısıanyń muraǵattyq beınejazbalary, yntymaqtastyq damýynyń kýágerleri men tikeleı qatysýshylardyń eksklúzıvti suhbattary (EO Syrtqy saıasat jónindegi komısary Benıta Ferrero-Valdner, Ortalyq Azıa boıynsha EO Arnaıy ókili Peter Býrıan, Eýroparlament depýtaty Iveta Grıgýle-Peterse, tuńǵysh QR Syrtqy ister mınıstri Tóleýtaı Súleımenov, Belgıadaǵy QR Elshisi Almaz Hamzaev, Qazaqstandaǵy Eýropalyq Odaq Ókildiginiń burynǵy jáne qazirgi basshylary jáne kóptegen basqalary). Fılm keıipkerleri estelikterimen, jumys barysynda esinde qalǵan sáttermen, sonymen qatar, Eýropa men Qazaqstan róli jáne ózara qabyldaýy, eýropalyq jáne qazaqstandyq dıplomatıa arasyndaǵy aıyrmashylyqtar týraly oılarymen bólisedi.
Aıta ketsek, Eýropalyq Odaq pen Qazaqstan Respýblıkasynyń arasyndaǵy Keńeıtilgen áriptestik jáne yntymaqtastyq týraly kelisimge (KÁYK) 2015 jyldyń 21 jeltoqsanynda qol qoıylǵan bolatyn. KÁYK-niń negizgi bólimderi 2016 jyldyń 1 mamyrynan bastap ýaqytsha júzege asyryla bastady. Kelisim 29 saladaǵy yqpaldastyq aıasyn keńeıtip, EO men Qazaqstan arasyndaǵy saýda-ekonomıkalyq jáne ınvestısıalyq, energetıka, kólik, qorshaǵan ortany qorǵaý jáne klımattyń ózgerýi, jumyspen qamtý, eńbek qatynastary, mádenıet, bilim jáne ǵylymı zertteý salalaryndaǵy yqpaldastyqqa jol ashty. 1991-2014 jj. aralyǵynda EO Qazaqstanda jalpy somasy 180 mln quraıtyn 350-den astam jobany tikeleı qarjylandyrdy. Bul jobalar QR Úkimetiniń ár túrli mınıstrlikteri, vedomstvolary men komıtetterine saıası keńes jáne tehnıkalyq kómekke baǵyttaldy.
