Shyǵys Qazaqstan oblysynda Tarbaǵataı taýynyń kúngeıindegi Úrjar aýdanynda Astananyń 20 jyldyǵyna arnalǵan búrkitshilerdiń respýblıkalyq týrnıri bastaldy. 

Óńirdegi qusbegiliktiń damýyna úlken úles qosyp júrgen ári osy chempıonatty uıymdastyrýshy Táttimbet Kápulynyń sózine qaraǵanda, 10 oblys pen qalalarynan 39 qusbegiler qatysyp jatyr.

«Búrkitshiler «qolǵa qondyrý», «shyrǵa salý», «qoıan alý», «túlki alý» jáne «qasqyr alý» túrleri boıynsha ózara baq synasady. Ádettegideı jarystyń birinshi kúni, ıaǵnı búgin qyrannyń babyn synaıtyn qusty qolǵa shaqyrý, erkin ushyrý, shyrǵaǵa salý sekildi saıystar ótkizilip jatyr», deıdi Táttimbet Kápuly.

Respýblıkalyq týrnırdiń alǵashqy kúni saıystyń búrkitshileri kók taǵylarymen «qolǵa shaqyrý» jáne «shyrǵa salý» túrleri boıynsha synǵa tústi. Aýqymdy saıys erteń aıaqtalmaq. Eske sala ketsek, búrkitshiler saıysy Shyǵys Qazaqstan oblysynyń Úrjar aýdanynda osymen ekinshi jyl qatarynan uıymdastyrylyp otyr.

Búrkitshilerdiń bıylǵy respýblıkalyq básekesine qatysyp jatqan qusbegilerdiń  jas aıyrmashylyǵy ártúrli. Degenmen, eń jasy kishi qusbegi - Aqmola oblysy, Eńbekshilder aýdanynan qyran baptap ákelgen 18 jastaǵy Baıraq Tastanbekuly eken. Ol ótken jyly Astanada ótken qusbegiler chempıonatynda úshinshi oryndy qanjyǵasyna baılaǵan. Qyrandar saıysy erteń aıaqtalmaq.