Mektep túlekteriniń jyl saıynǵy ýaıymy – UBT. Óıtkeni bar ómiri UBT-ǵa baılanyp qalmasa da, synaqtan keıingi nátıje, sózsiz, bolashaǵyna áser etedi. Emtıhanǵa qalaı daıyndalý kerek degen suraq mektep túlekteriniń ǵana emes, muǵalimderdiń de bas aýrýyna aınalǵan. Osyǵan oraı «UStudy» aımaqtyq testileý ortalyǵy qazaq mektebin bitiretin túlekterge arnap qazaq tilindegi 2000 beınesabaqty YouTube arnasyna júktemek. Beınesabaqtar eń úzdik mektep muǵalimderiniń qatysýymen tegin kórsetiledi, dep jazady Qamshy.kz aqparat agenttigi.
UStudy aımaqtyq testileý ortalyǵy – muǵalimder men oqýshylarǵa kompúterlik testileý ótkizetin kompanıa. Qazaqstannyń birneshe aımaǵynda iri fılıaldary bar. Sońǵy 3 jylda kompanıa 3 mln-ǵa jýyq onlaın jáne oflaın testileý ótkizip, qashyqtan oqytý salasyndaǵy «UTUTOR» halyqaralyq jobasyn iske qosty.
— Búginde biz erkin qol jetkize alatyn 500-den astam beınesabaq júktedik. Aldaǵy ýaqytta, UBT-nyń barlyq pánderi boıynsha 2000 beıne sabaq júkteýdi josparlap otyrmyz, — deıdi kompanıa basshysy Janat Rahmanı.
Onyń aıtýynsha, bul jobany ózinen basqa eshkim qarjylandyrmaıdy. Atalǵan ortalyqtyń basty maqsaty – alys aımaqtaǵy túlekterge az ýaqyt ishinde tegin ári sapaly bilim usyný.
UStudy ortalyǵynyń YouTube jelisinde arnasy bar. Taǵy bir aıta keterligi – tegin beınesabaqtardy júktegennen keıin paraqshaǵa jazylýshylardyń sany bir aıda úsh ese ósken. Osylaısha, ortalyqtyń alǵashqy qadamy sátti bastalypty. Beınesabaqtar osydan birneshe jyl buryn túsirilgendikten, sapasy keremet dep aıta almaımyz. Alaıda sapasynan buryn sabaqty 5-10 mınýt ishinde keńinen taldap, túsinikti tilmen oqýshyǵa uǵyndyra bilgeni mańyzdyraq. Mysaly, hımıa páni oqýshyǵa qyzyqty ári este qalarlyqtaı bolýy úshin muǵalim túrli zerthanalyq jolmen túrli synaq jasaıdy.
Janat Rahmanı qazirgi ýaqytta qazaq tilinde bilim alýǵa suranys kóp dep sanaıdy.
— Áleýmettik jeliler keńistiginde mazmuny uqsas resýrstar joq. Osy taqylettes birneshe arna bar. Alaıda olar teorıa men tereń bilimdi qamtamasyz ete almaıdy. Keıbir beınesabaqtardyń sany, qoldaný merzimi shekteýli, — deıdi Janat Rahmanı.
Janat Rahmanıdyń jospary kóp. Bolashaqta mektep túlekterine tek bilim berip qana qoımaı, ómir súrýge, maqsat qoıa bilýge, shabyttanýǵa psıhologıalyq trenıń arqyly kómektesýdi kózdeıdi.
— Meniń oıymsha, 10-11 synyp oqýshysyna mektep aıtarlyqtaı qajet emes. Sebebi oqýshy bul kezde ómir súrýdi úırenýi kerek. Joǵarǵy synyp oqýshysy aldyna maqsat qoıyp, qandaı qyzmet atqaratynyn, qandaı mamandyqqa túsetinin anyqtap, aıqyndap alýy tıis. Keıin JOO-ǵa barǵanda jan-jaǵyna jaltaqtamaı, óz kásibin ashyp, tabysqa jetýi kerek. JOO-daǵy 1 kýrsta onyń ómiri jańa ǵana bastalmaı, tolyqqandy ómir súrgeni jón. Sol sebepti joǵarǵy synyp oqýshylaryna osynyń bárin úıretken durys dep esepteımin, — deıdi Janat Rahmanı.
