Volgogradtaǵy perzenthana qyzmetkerleriniń qateliginen erli-zaıypty uldaryn jeti jyl boıy óldi dep oılaǵan. Osy ýaqyttar ishinde jeti jastaǵy bala jetimder úıinde ósti. Bul týraly Reseıdiń Volgograd oblysyndaǵy Federaldyq sot oryndaýshysynyń qyzmeti habarlaǵan.

Jergilikti BAQ taratqan derekterge súıensek, perzenthanada 2011 jyly jańa bosanǵan áıelge sábıiniń bir aptaǵa jetpeı óletinin aıtqan. Muny bilgen erli-zaıypty bas tartý týraly aryz jazady. Alaıda raıynan qaıtqan ata-ana bes kúnnen soń sábılerin alyp ketýge balalar úıine barǵanda, qyzmetshiler uldarynyń endigi ólip qalǵanyn aıtady.

Jeti jyl ótken soń sot qyzmetkerimen kezikken áıel kútpegen tosyn syıǵa keneledi. Sot oryndaýshysyna kámelettik jasqa tolmaǵan balaǵa kútim jasap jatqan ınternattyń paıdasyna tólenetin alımentti ata-anasynan óndirý jóninde qujat túsken. Sot qyzmetkeri olardyń meken jaıyn tappaǵan soń, anasynyń shotyn buǵattap tastaıdy. Bul jaǵdaıdan keıin áıel álgi sot qyzmetkeriniń ózine baryp, istiń mán-jaıyn anyqtaǵysy keledi. Tıisti qujattardy oqyp, ulynyń tiri ekenin biledi. Sebebi osy ýaqytqa deıin erli-zaıypty sábıdi óldige sanap kelgen.

«Balalarynyń tiri ekenin aıaq-asty bilgen erli-zaıypty ata-ana quqyǵyn qaıtarý úshin sotqa júgindi. 2017 jyldyń qarashasynda jeńiske jetip, 2018 jyly bala zańdy túrde bıologıalyq ata-anasynyń qolyna ótti», - delingen Volgograd oblysyndaǵy Federaldyq sot oryndaýshysynyń qyzmeti taratqan aqparatta.