SHQO ákimi Danıal Ahmetov: «Biz táýekeldi eginshilik aımaǵyndamyz, sondyqtan jańa tehnologıalardy belsendi qoldanýymyz kerek», - deıdi.

Shyǵys Qazaqstan oblysynyń ákimi Danıal Ahmetovtiń pikirinshe, óńirdiń aýylsharýashylyǵy salasy ókilderine ózderiniń eginshilik dástúrin ózgertip, jańa tehnologıalar men tuqymdardy qoldanýdy qolǵa alý kerek.   

«Memleket basshysy Joldaýda júktegen mindetterdiń biri, álemdik tájirıbeni jergilikti jaǵdaıǵa beıimdeýdi negizge ala otyryp ınovasıalyq jobalarmen aınalysýymyz kerek», – dedi D.Ahmetov turǵyndar aldyndaǵy eseptik kezdesýinde.

Bul rette óńir basshysy tájirıbelik maıly daqyldar sharýashylyǵyn mysalǵa keltirdi. Keıingi úsh jyldyń kóleminde atalmysh sharýashylyqta maıly daqyldardyń jańa suryptary men býdandary óndirilgen. Jańa ónimder tuqymdy mehanıkalyq óńdeýden bas tartyp, onyń ornyna tolyq hımıalyq óńdeýge kóshýge múmkindik berdi.

Qazirgi kúni kúnbaǵystyń úsh býdany memlekettik surypty synaýdan ótkizilýde, olardyń ekeýi qoldanysqa daıyn.

Sonymen qatar oblysta sheteldik seriktestermen birlesip soıanyń, zyǵyrdyń jáne dándi daqyldardyń sapaly suryptaryn óndirý boıynsha jumystar júrgizilýde.