«Qazaqstan» RTRK» AQ-nyń basqarma tóraǵasy Erlan Qarınniń buıryǵymen Ońtústik Qazaqstan oblystyq fılıalynyń dırektory bolyp Berdimuratov Baýyrjan Qambaruly taǵaıyndaldy, dep habarlaıdy Qamshy.kz aqparat agenttigi «Qazaqstan-SHymkent» telearnasyna silteme jasap.

Ujymǵa jańa basshyny «Qazaqstan» RTRK basqarma tóraǵasynyń orynbasary Serik Egizbaev tanystyrdy. 

«Ońtústik» telearnasyn buǵan deıin basqarǵan Ýálı Saǵyndyquly Qydyr «Qazaqstan» RTRK» AQ-nyń Sharýashylyqty qamtamasyz etý basqarmasynyń basshysy bolyp taǵaıyndaldy. 

Baýyrjan Berdimuratov 1974 jyly Ońtústik Qazaqstan oblysy, Ordabasy aýdanynda týǵan. Almatydaǵy Abaı atyndaǵy Qazaq pedagogıkalyq ýnıversıtetin támámdaǵan. Mamandyǵy boıynsha - fılolog. Lomonosov atyndaǵy Máskeý memlekettik ýnıversıtetinde ekonomıka jáne basqarý mamandyǵy boıynsha oqyǵan. Birqatar buqaralyq aqparat quraldarynda redaktorlyqtan bastap, basshylyq qyzmetterdi atqarǵan.

1996-1998 jyldar aralyǵynda Qanysh Sátbaev atyndaǵy qazaq memlekettik polıtehnıkalyq ýnıversıtetinde aǵa oqytýshy, 2009-2015 jyldary respýblıkalyq «Rahat TV» telearnasynyń dırektory-bas redaktory bolyp qyzmet atqardy.

2017 jyldan bastap búginge deıin Ońtústik Qazaqstan oblysy ákiminiń baspasóz hatshysynyń orynbasary bolyp eńbek etti.