«Senat baıaǵydan qazaqsha sóıleıdi nemese men joqta «tórime jatyp alǵan» qonaqtar týraly» degen taqyryppen QR Parlamenti Senaty baspasóz qyzmetiniń jetekshisi Ádilbek Qaba óziniń Facebook paraqshasynda jazba jarıalady. 

— Bul ózi qyzyq boldy. Paraqshamdy ashyp qalsam meniń betimde men ornalastyrmaǵan bir dúnıe turady. Kúnde solaı. Ózińiz joqta úıińizge kirip, tórge shyǵyp jatyp alǵan sıaqty nárse eken. Alaıda men oǵan renjigen joqpyn. Aıtary bar azamattardyń pikirleri eken. Onyń birine jaqynda ary-berisin saralap jaýap beremin. Ekinshisi ózimniń «Aıqyndyq» áriptesim Berik Beısenulynyń jazbasy eken. Paraqshany ashqanymda «Olar sóıleı alady. Sóılep jatyr. Bir-aq aýyz sóz olardy sóıletip jiberdi. Bilmeı júr ekenbiz, baǵalamaı júr ekenbiz ǵoı, bizdiń mınıstrler polıglot eken. Bir túnde til úırenip aldy» dep bastaǵan jazbany kórgende «oıpyrmaı, ne boldy men uıyqtap turǵansha biraz nárse ózgerip ketip, qur qalǵanmyn ba» dep ári qaraı oqysam, barlyq áńgime Elbasynyń "Qazaq tiliniń mártebesin arttyrý jónindegi jumystardy jalǵastyrýymyz qajet. Parlament pen Úkimettiń qyzmeti tek memlekettik tilde júrgizilýge tıis. Sondaı-aq, bul másele boıynsha azamattardyń quqyǵyn shekteýge bolmaıdy. Olar úshin ilespe aýdarma jasaý múmkindigin qarastyrǵan jón", - degen sózinen bastaý alyp jatyr eken.

Shynymen-aq, azamattar jıyndardy jappaı qazaqsha ótkizip jatyr. Seń qozǵaldy. Kenen atamnyń áninde «Osy edi ǵoı kútkenim baıaǵydan» deıtinindeı, jurttyń kútkeni de osy edi. Endi shetten kelgen elshilermen de tek qazaqsha pikir almassa, shetelderde ótetin jıyndarda da baıandama qazaqsha jasalsa, tipten keremet bolar edi. Eń bastysy, barlyq qujatttar aldymen qazaqsha daıyndalmaı eshnárse ózgermeıdi. 

Senattyń qazaqshasy qalaı ekenin aıtaıyn. Nege ekenin bilmeımin, men Senatqa kelgenge deıin barlyq jıyndar, Palata otyrystary barlyq jerdegideı oryssha ótetin shyǵar dep oılaıtynmyn. Osydan bes alty jyl buryn qyzmetke shaqyrylyp, alǵashqy jıynyna qatystym. Tań qaldym. Búkil jıyndar bastan aıaq qazaq tilinde ótedi. Senbeseńiz, onlaın qosyp kórińiz. Arhıvterin aqtaryp kórińiz. Árıne, arasynda tilin syndyrmaǵan mınıstrler kelip oryssha baıandama jasaıdy, oǵan amal joq. Endi óıtpeıtin shyǵar. Bári talpynyp jatyr ǵoı.

...Tildi áli tolyq meńgermegenderdiń de jaǵdaıy jasalǵan. Oryssha bilmeıtinge qazaqsha, qazaqsha bilmeıtinine oryssha sınhrondy aýdarma jasalady. 

Jazda Shálkóde jaılaýynda júrgenimizde búrkip óte shyǵatyn jaýyn bolýshy edi. Ony biz «ótkinshi» dep ataıtynbyz. Elemeıtinbiz. Memlekettik organdardyń qazaq tilinde sóılep, is qaǵazdaryn júrgizýi de ótkinshi bolmasa eken dep tileıik, - dep jazdy Á. Qaba.