SHQO-daǵy Aıagóz qalasynda úıin sý basqan balanyń ákesine aıtqan sózderi halyqtyń júregin eljiretti. «Eshteńe etpeıdi, áke, jóndep alamyz, ıá?», - dep ákesin jubatpaq bolǵan balanyń vıdeosyn Instagram jelisindegi oskemenlive paraqshasy jarıalady.
Aıta keteıik, oblys ortalyǵynda eki kún boıy tolassyz jaýǵan qar aralas jańbyrdyń saldarynan qalanyń birqatar aýdany men kóshelerin sý basqan. Sonyń saldarynan Óskemen qalasynan bólek, Ulan, Aıagóz, Glýbokoe, Zyrán aýdandary men Rıdder qalasynda birneshe úıdi sý aldy. Buǵan qosa, apattan Krasın kentindegi Kojedýb jáne Pýshkın kósheleri boıynda ornalasqan tórt úıdiń turǵyndary zardap shekti. Jergilikti turǵyndardyń aıtýynsha, mundaı jaǵdaıdyń oryn alýyna osy mańdaǵy aryq arnasynyń jóndi ári ýaqtyly tazalanbaýy sebep bolǵan. Nátıjesinde aryq sýy arnasynan asyp, irgedegi aýlalar 40 santımetrlik sý astynda qalǵan.
Kúni keshe oblys ákimi Danıal Ahmetov Óskemen qalasynyń sý basqan aýdandarynda bolyp, tabıǵı apattan zardap shekken turǵyndarmen kezdesip qaıtqan bolatyn. Aımaq basshysy shahardyń irgesindegi Krasın kenti men Ablaketka yqshamaýdandarynda qarǵyn sý basqan jeke úılerdiń turǵyndarymen jolyǵyp, hal-jaǵdaıyn bilip qaıtty. Apatty jaǵdaıǵa tabıǵatty emes, soǵan jaýapty laýazymdy tulǵalardy kinálaǵan edi.
