«Nur Otan» partıasy Shyǵys Qazaqstan oblysyndaǵy tabıǵat apatynan zardap shekken jandarǵa alǵashqylardyń biri bolyp kómekke keldi. Tasqyn men nóser jaýyn saldarynan 140 jeke úı, 180 aýla jáne 110 saıajaıdy sý basyp qalǵan. Shamamen 400-ge jýyq jergilikti turǵyn qaýipsiz jerge kóshirildi.

Shyǵys Qazaqstan oblystyq Tótenshe jaǵdaılar departamentiniń málimetine súıensek, dál qazirgi tańda tasqyn sý keri qaıta bastaǵan. Soǵan oraı halyq ta óz úılerine oralýda. Degenmen, úı-jaılarǵa aıtarlyqtaı zalal kelgenin atap ótken jón.

Osyǵan baılanysty «Nur Otan» partıasynyń Shyǵys Qazaqstan oblystyq fılıaly jyly kıimder, rezińke etikter, buzylmaıtyn azyq-túlik jáne taǵy basqa gýmanıtarlyq kómekter qabyldaıtyn arnaıy 5 pýnkt ashty. Atalǵan qabyldaý núkteleri myna mekenjaılarda ornalasqan: 

• Óskemen q., «Nur Otan» partıasy Shyǵys Qazaqstan oblystyq fılıalynyń ǵımaraty, Q.Qaısenov kósh., 121;
• Óskemen q., «Jas Otan» Jastar qanatynyń qalalyq bólimi, Áýezov kósh., 5;
• Óskemen q., Oblystyq jastar ortalyǵy, Potanın kósh., 37;
• Semeı q., «Nur Otan» partıasy qalalyq fılıalynyń ǵımaraty, Shaıjúnisov kósh., 138;
• Aıagóz q., «Nur Otan» partıasy aýdandyq fılıalynyń ǵımaraty, H.Dúısenov kósh., 104.

 Sý tasqynynan zardap shekken Aıagóz qalasynyń turǵyndaryna myna esepshot arqyly qarjylaı kómek kórsetýge bolady:

 «Bolashaq Aıagóz» QQ

BIN 110740000641

BIK KZKOKZKX

KBE 18

Aǵymdaǵy esepshot nómiri KZ279260301178000004 KZT «Kazkommersbank» AQ bólimshesi.

 «Nur Otan» partıasy Shyǵys Qazaqstan oblystyq fılıalynyń málimeti boıynsha zardap shekkenderge gýmanıtarlyq kómekter keshe kelip túse bastaǵan. Atalǵan aksıaǵa qazirdiń ózinde Atyraý, Mańǵystaý jáne Aqtóbe oblystarynyń fılıaldary atsalysyp úlgerdi.