15 naýryzdan bastap, «Qazaqstan» RTRK» quramyna enetin «Balapan» telearnasynyń kóktemgi maýsymy ashylady, dep habarlaıdy Qamshy.kz aqparat agenttigi.

Jańa maýsym aıasynda 9 jańa telejoba kórermenge jol tartady. «Jańa maýsymda telearna ǵylym salasyna den qoıyp otyr. IT tehnologıalardyń qyr-syry men ǵylymı tájirıbeler «Jas ǵalym» atty jańa tanymdyq baǵdarlamada kórinis tabady. Al ákesi men ulynyń arasyndaǵy qyzyqty oıynǵa qurylǵan «Bala bop», tanymal bloger analar men balalary qatysatyn «Úıdemiz - úırenemiz» jobalary kórermenderge ýaqytty tıimdi ári paıdaly ótkizýdiń úlgisin kórsetedi», - delingen mınıstrliktiń resmı habarlamasynda.

Sonymen qatar, telearna óner-bilim, sport salalaryndaǵy úzdik balalardyń jeńiske jetý jolyn baqylaıtyn «Kúndelik» baǵdarlamasy kórermenge jol tartady. Meımandarǵa tanystyrylǵan kezekti bir joba - «Qalamger kitaphanasy». Aty aıtyp turǵandaı, bul habar tanymal aqyn-jazýshylardyń kitaphanalary men úzdik týyndylarynyń jazylý tarıhymen tanystyrady. Jańa maýsymdaǵy taǵy bir erekshe baǵdarlamalardyń biri - «Múmkindik».

  Jobada balalar bir kún boıy túrli kásip ıelerimen, olardyń jumys barysymen tanysa alady. Taǵy bir aıta keterligi, kóktemgi maýsymda arnanyń kishkentaı jıhankez kórermenderi «Saıahatshy balapan» jobasyna ózderiniń shet elge saıahaty jaıly shaǵyn beıneúzikter ázirlep, joldaı alady. Osylaısha balalar da arnanyń kontentin jasaýǵa tikeleı atsalysady. Sonymen birge, telearna tarıhynda tuńǵysh ret ata-analarǵa arnalǵan tikeleı efırdegi «Bala time» baǵdarlamasynyń tusaýy kesiledi.