Búgin Astanada Tájikstan Respýblıkasynyń Prezıdenti Emomalı Rahmonnyń Qazaqstan Respýblıkasyna resmı sapary aıasynda Qazaqstan Respýblıkasy Din isteri jáne azamattyq qoǵam mınıstrligi men Tájikstan Respýblıkasynyń Úkimeti janyndaǵy Din isteri, ulttyq dástúrler, merekeler men salt-joralardy retteý Komıteti arasynda yntymaqtastyq týraly Memorandýmǵa qol qoıyldy, dep jazady Qamshy.kz aqparat agenttigi.

Qujatqa Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev pen Tájikstan Respýblıkasynyń Úkimeti janyndaǵy Din isteri, ulttyq dástúrler, merekeler men salt - joralardy retteý Komıtetiniń tóraǵasy Davlotzada Sýlaımon qol qoıdy.

Memorandým aıasynda din salasyndaǵy memlekettik saıasatty júrgizý salasynda,  onyń ishinde dinı ekstremızmniń aldyn alý máseleleri boıynsha tájirıbe almasý qarastyrylǵan.  

Taraptar ózara qyzyǵýshylyq týdyrǵan máseleler boıynsha kezdesýler men is-sharalar uıymdastyryp, naqtyraq aıtqanda destrýktıvti dinı ıdeologıanyń jáne dinı ekstremızm kórinisteriniń taralýyn boldyrmaý maqsatynda túsindirý jumystaryn júrgizýdi josparlaýda.

Budan bólek, taraptar birlesken zertteýler júrgizý úshin ǵylymı-zertteýlermen aınalysatyn uıymdar arasyndaǵy yntymaqtastyqty damytýǵa nıet bildirýde. 

Qujatta taraptar birlese óz memleketteriniń ulttyq zańnamalary sheńberinde din salasyndaǵy yntymaqtastyqty júzege asyratyndyǵy kórsetilgen. 

Sondaı-aq, Qazaqstandyq jáne tájikstandyq vedomstva basshylary ekijaqty yntymaqtastyq máselelerin de talqylady.