Ortalyq komýnıkasıalar qyzmetinde Batys Qazaqstan oblysynyń ákimi Altaı Seıdiruly Kólginovtyń qatysýymen óńirde «Rýhanı jańǵyrý» baǵdarlamasynyń júzege asýy týraly baspasóz konferensıasy ótti dep habarlaıdy Qamshy.kz aqparat agenttigi. 

«Baǵdarlamaǵa 2017 jyly mesenattar qarjysy esebinen 2,5 mlrd. teńge jumsalyp, 60 joba júzege asyryldy. Onyń ishinde 10 áleýmettik nysan (balabaqsha, sport keshenderi, medısınalyq ambýlatorıalar), 5  mádenıet nysany (eskertkishter, mýzeıler) salyndy jáne jóndeýden ótkizildi. 24 nysanda abattandyrý (kishi sáýlet formalary, saıabaq, tynymbaqtar) jumystary atqaryldy. 21 nysannyń materıaldyq-tehnıkalyq bazasy jańartyldy. Bıyl da osy jumystar qarqyndy júzege asyrylatyn bolady», - dedi oblys ákimi  Altaı Kólginov.

Sondaı-aq  A.Kólginov oblystaǵy bilim salasyndaǵy atqarylǵan jumystardy atap ótti. Sonyń ishinde ótken jyly mektep túlekterine 200 grant bólingendigi, IT-mektebin ashý jospary, joǵary oqý oryndarynda kásipkerlikti qoldaý ortalyǵynyń jumysyna toqtaldy. 

A.Kólginov óz baıandamasynda óńirdegi ulttyq dástúrdi qaıta jańǵyrtý boıynsha jumystardy da aıtty. «Óńirimizdiń barlyq mektepterinde úzilis kezinde qazaq kompozıtorlarynyń kúılerin oınatýdy qolǵa aldyq. Oǵan qosa, mektepterde dombyra úıirmeleri keńeıtilýde. Sondaı-aq, Oral qalasynda «Dombyra kúnin» ótkizý josparlanyp otyr», - dep atap ótti oblys ákimi.

BQO ákimi baıandamasynyń bir bóligi óńirdiń qasıetti oryndaryna arnaldy. «Qasıetti oryndar» tizimine engen «Bókeı Ordasy» tarıhı-mýzeı keshenine ózimizden jáne alys-jaqyn elderden keletin týrıserdiń qyzyǵýshylyǵy aıryqsha. Bul óńirimiz úshin óte mańyzdy joba. Oblys ortalyǵynan shalǵaı jerde, 600 shaqyrym qashyqtyqta ornalasqan keshende týrızmdi damytý maqsatynda kishi avıasıany, jergilikti áýe jelilerin damytýdy qolǵa alýdamyz. Osyǵan sáıkes, buryn bolǵan áýe aılaqtary 2021 jylǵa deıin qaıta qalpyna keltiriletin bolady», - dedi BQO ákimi.

Aıta ketý kerek, bıyl Oral qalasynda zamanaýı Mádenıet saraıynyń qurylysy bastalady.