Búgin Qazaqstanǵa resmı is-sapary aıasynda Koreıa Respýblıkasynyń depýtattary, Ulttyq Assambleıasynyń tóraǵasy Chon Se Gúnniń bastaýymen «Nur Álem» - «Bolashaq energıasy» murajaıyna keldi, dep habarlaıdy Qamshy.kz aqparat agenttigi.
Olarǵa elimizdiń basty kórikti nysanyna ekskýrsıa ótkizildi.
«Nur Álem» ekspozısıalarymen Ońtústik Koreıanyń partıa ókilderi, sondaı-aq, Koreıa Respýblıkasynyń Ulttyq Assambleıasy syrtqy ister jáne birlestigi, áıel jáne otbasy, ulttyq saıasat, strategıa jáne qarjy, bilim, mádenıet, sport jáne týrızm jónindegi komıtet músheleri tanysty.
Qazaqstan jaǵynan qonaqtardy QR Parlament Májilisi Tóraǵasynyń orynbasary Vladımır Bojko men «Astana EKSPO-2017» Ulttyq kompanıasy» AQ Basqarma Tóraǵasynyń orynbasary Allen Sháıjúnisov qarsy aldy.
Ekskýrsıa barysynda ońtústik korályq depýtattar EKSPO-2017 murasy nysandary men Ulttyq kompanıa qyzmetine joǵary baǵa berdi.
Chon Se Gúnnyń aıtýynsha, tanymdyq kózqaras jaǵynan «Nur Álemdi» aralaý óte paıdaly da, qyzyqty boldy.
- Buryn men ındýstrıa jáne energetıka mınıstri laýazymyn atqardym, sondyqtan biz dástúrli energıa kózderine táýeldi bolmaı, «jasyl» tehnologıalar men balamaly energıa kózderin damytý jáne ilgeriletýdi alǵa qoıýmyz qajet. Myna biregeı murajaıdy kórip, men, Qazaqstannyń aldyńǵy qatarly eldermen birge durys baǵytta kele jatqanyn túsindim, - dep ońtústik koreıalyq Parlament spıkeri atap ótti.
Sondaı-aq, Ońtústik Koreıa Ulttyq Assambleıasynyń tóraǵasy óz eliniń EKSPO-2017 kórmesine jiti daıyndalyp, «jasyl» energetıka salasyndaǵy jańalyǵyn usynǵanyn aıtyp ketti.
- Qazaqstan Respýblıkasynyń Prezıdenti Nursultan Nazarbaevtyń ulttyq pavılonymyzǵa kelgeni biz úshin úlken abyroı. Astanada ótken kórmeniń Qazaqstan ekonomıkasynyń damýyna úlken serpin beretinine senimdimin, - dedi Chon Se Gún.
Óz kezeginde Ulttyq kompanıa Basqarma Tóraǵasynyń orynbasary Allen Sháıjúnisov asa qurmetti qonaqqa Kórme murasyna qyzyǵýshylyq tanytyp jáne Koreıanyń «EKSPO-2017» kórmesine qatysqany úshin alǵysyn bildirdi.
