Bas Prokýrordyń tapsyrmasy boıynsha arnaıy prokýror Ońtústik Qazaqstan oblysynyń kishkentaı turǵynyna qatysty zorlyq áreketteri týraly aryz boıynsha sotqa deıingi tergep-tekserýdi óz óndirisine qabyldady, dep habarlaıdy Qamshy.kz aqparat agenttigi QR Bas prokýratýranyń baspasóz qyzmetine silteme jasap.
«Qylmystyq-prosestik kodekske sáıkes, kámelettik jasqa tolmaǵandardyń quqyǵyn saqtaý jáne oryn alǵan oqıǵanyń mán-jaıyn anyqtaý maqsatynda barlyq qajetti sharalar qabyldanýda.
Prosestiń barlyq qatysýshylarynyń ótinishhattary negizinde keshendi sot-medısınalyq saraptamaǵa kásibı mamandar jumyldyrylatyn bolady.
Qylmystyq istiń tergelý barysy Bas prokýratýranyń baqylaýynda. İstiń fıgýranttary jasóspirim bolǵandyqtan, Qylmystyq-prosestik kodekstiń 532-babyna sáıkes, kámeletke tolmaǵandardyń qupıalylyqqa degen quqyqtaryn saqtaý qajettigin eskertemiz», - delingen vedomstvo habarlamasynda.
Jeke ómir týraly málimetterdi kópshilik aldynda, sonymen qatar buqaralyq aqparat quraldaryn qoldaný arqyly jarıa etken úshin Qylmystyq kodekstiń 147-baby boıynsha qylmystyq jaýapkershilik qarastyrylǵan.
Tergeý nátıjesi týraly aqparat jasóspirimderdiń quqyǵy men zańdy múddelerin eskere kele, qoǵam nazaryna tıisti kólemde jetkiziledi.
