Búgin, 15 naýryzda Almaty Metropolıteni «M.Áýezov drama teatry» beketinde M.Áýezov atyndaǵy Qazaq Memlekettik akademıalyq drama teatry «Teatr álemi» atty kórmeniń lentasyn qıdy. Saltanatty túrde ashylǵan kórme Elbasy N.Á.Nazarbaevtyń «Rýhanı jańǵyrý» baǵdarlamasy aıasynda jáne teatr mýzeıiniń 50 jyldyǵyna oraı uıymdastyryldy.
Bul kórme – óskeleń urpaqqa, teatr ónerine, tarıhyna qyzyǵatyn izdenýshilerge, jalpy ónersúıgish qaýymǵa qazaq óneriniń qarashańyraǵy, 92 jyldyq tarıhy bar M.Áýezov atyndaǵy Qazaq Memlekettik akademıalyq drama teatrynyń qurylǵan kezeńinen bastap búgingi kúnge deıingi óner shejiresinen syr shertip, teatr mýzeıiniń tynys-tirshiliginen, mol mura, qundy jádigerleri týraly maǵlumat beredi.
Teatr artıseriniń ár jyldary árqandaı qoıylymdarda kıgen sahnalyq kostúmderi, fotosýretter men portretter, afıshalar men baǵdarlamalar, óner maıtalmandarynyń jeke zattary jáne t.b. qundy jádigerler kórmeden oryn aldy.
Kórmeniń lentasy qıylmas buryn teatr hory «Aıttym sálem qalamqas» dep áýeletip án shyrqasa, teatr artıseri repertýardaǵy «Qyz Jibek» spektaklinen arıalar oryndady. Al, N.Nazarbaevtyń sózine jazylǵan B.Tileýhannyń «Jerim meniń» áni jıylǵan qaýymdy bir serpiltip tastady.
Elbasy N.Á.Nazarbaevtyń «Bolashaqqa baǵdar: rýhanı jańǵyrý» aıasyndaǵy Uly Dala aspanyna alash armanyn alyp shyǵatyn aıtýly sharalardyń biri, ult muraty úshin bitimgershilik pen birlikti maqsat tutqan, 92 jyldyq tarıhy bar teatrymyzdyń qazynaly jádigerleri men muralaryn 50 jyl boıy el ıgiligine jaratyp kele jatqan teatr mýzeıiniń asyl dúnıeleri men teatr rýhanıatyn biriktirgen «Almaty Metropolıten» mekemesimen birlesip jasaǵan is- sharamyz mádenıetke qosylǵan taǵy bir úles dep bilemiz.
Bul – mádenıetimiz ben ıdeologıamyzdy damytý jolynda jasalǵan naqty áreket ári óskeleń urpaqty teatr syndy rýhanı azyq berer oryndarǵa shaqyrýdyń bir joly jáne «Rýhanı jańǵyrý» men ulttyq kod syndy uǵymdardyń halyqqa keńinen nasıhattalýyna áser eter faktor bolady degen senimdemiz.
