Búgin Ońtústik Qazaqstan oblysynyń ákimi Janseıit Túımebaev Qazaqstan Respýblıkasy Ulttyq ulany Bas qolbasshysynyń tárbıe jáne áleýmettik-quqyqtyq jumystary jónindegi orynbasary general-maıor Muhametqalı Satovty jáne Ulttyq ulan jaýyngerleri: «Aıbyn» ordeniniń ıegeri aǵa leıtenant Erbol Otarbaev pen «Jaýyngerlik erligi úshin» medaliniń ıegeri Syrym Súndetovty  ata-analarymen birge qabyldady.

Kezdesý barysynda óńir basshysy óńtústikten shyqqan er jaýyngerlerdiń eńbegine joǵary baǵa berip, tárbıelep ósirgen ata-analaryna rızashylyǵyn bildirdi jáne olardyń erlik  úlgisinde óskeleń urpaqty tárbıeleý kerek ekenin atap ótti.

Óz kezeginde  sóz alǵan general-maıor Muhametqalı Satov, óńirden shyqqan jaýyngerlerdiń erlik oqıǵasy áskerdegi tárbıe jumystarynyń ózegine arqaý bolǵanyn atap ótti. Sondaı-aq keshe ǵana qazaqstandyq kınoteatrlarda keń prokatta kórsetile bastaǵan Ulttyq ulan jaýyngerleriniń batyldyǵy men qaısarlyǵyn baıandaıtyn  «Altynshy beket» kórkem fılmi týraly sóz qozǵap,   onyń jastardy qazaqstandyq patrıotızm rýhynda tárbıeleý jumysynda oıyp oryn alatynyn tilge tıek etti.

Kezdesý sońynda oblys ákimi Janseıit Túımebaev erjúrek jaýyngerlerdi alǵys hatpen marapattap, baǵaly syılyqtar tapsyrdy. Al, batyrlardyń ata-analaryna qazaqy dástúrmen shapan jaýyp, qamzol kıgizdi.