Búgin QR Parlament Májilisinde bilim jáne ǵylym mınıstri Erlan Saǵadıevtiń qatysýymen «Bilim berý salasyndaǵy sıfrlandyrý týraly» taqyrybynda Úkimet saǵaty ótti, dep jazady Qamshy.kz aqparat agenttigi.

Úkimet saǵatynda baıandama jasaǵan Erlan Saǵadıev aldaǵy jyldarda bilim berý júıesinde oryn alatyn ózgerister men sıfrlandyrý úderisi qalaı júzege asyrylatynyn aıtyp ótti. Keıinnen depýtattardyń birqatar saýaldaryna jaýap berdi.

Mınıstrdiń aıtýynsha, sıfrlandyrýdy damytý jumystary úsh baǵytta júzege asyrylatyn bolady: orta bilimdi aqparattandyrý, bilim júıesin basqarý prosesterin aqparattandyrý jáne İT mamandaryn daıarlaý.

Búgingi Úkimet saǵatynda mınıstr Saǵadıev ınformatıka pánin birinshi synyptan bastap oqytýdy qolǵa alý kerektigin aıtty jáne bul bastama qoǵamnyń talqysyna túsetinin baıandady.

«OESR elderinde kóbisi programmalaý negizderin 1-synyptan bastap oqytady. Bizde «Informatıka» páni mektepte 5-synyptan bastap oqytylǵan. Al bıyl 3-synyptan bastalady. Sonymen qatar 5-11-synyptarda «Informatıka» pánindegi programmalaý tilderi qaıta qarastyrylatyn bolady. Programmalaý tilderi tez tez ózgerip otyrady, sondyqtan bizdiń balalar eń sońǵy programmalarmen oqýy kerek. Sonymen qatar, oqytýdy 1-synyptan bastap engizý múmkindigi boıynsha eksperttermen jumys júrgizip jatyrmyz. Qazir joba jasalyp, ári qaraı qoǵamda jáne muǵalimdermen talqylanatyn bolady», - dedi mınıstr.

Erlan Saǵadıevtiń aıtýynsha, búginde 5400 pedagog biliktilik kýrsynan ótken, onyń ishinde 730 pedagog robotehnıka boıynsha biliktilik kýrstaryna qatysqan.

«Qazirgi kezde 3 myńnan astam mektep pen oqýshylar saraıynda robototehnıka boıynsha elektıvti kýrs engizildi. Biraq bizge robototehnıkany barlyq mektepterge deıin jetkizý kerek. Búgingi mindet – ol robototehnıka kabınetterin komplekttermen jabdyqtaý. Ótken jylda jergilikti organdar men výzdardyń esebinen segiz júzge jýyq jańa tolyq kabınet satyp alyndy, ol jumysty jalǵastyramyz. 2018 jyly taǵy eki jarym myń muǵalimdi oqytamyz. Sonyń ishinde robototehnıka da bolady. Taǵy júz myńnan astam pán muǵalimderi aqparattyq komýnıkasıalyq tehnologıalardy qoldaný boıynsha kýrstarynan ótti. Qazirgi ýaqytta endi barlyq kýrska kelgen muǵalimder mindetti túrde  IT qoldaný kýrstarynan ótedi», - dedi bilim jáne ǵylym mınıstri.