Uber kompanıasy AQSH-tyń barlyq qalasynda júrgizýshisiz basqarylatyn kólik synaýdy ýaqytsha toqtatty dep jazady Qamshy.kz aqparat agenttigi Azattyqtyń deregine súıenip. Buǵan naýryzdyń 19-y kúni Arızona shtatynyń Tempe qalasynda júrgizýshisiz basqarylatyn kóliktiń joldan ótip bara jatqan áıeldi qaǵyp ketkeni sebep bolyp otyr.

Polısıanyń málimetinshe, avtopılot rejıminde ketip bara jatqan kólik kóshede jaıaý júrginshi ótýge bolmaıtyn jerde ketip bara jatqan 49 jastaǵy áıeldi qaǵyp ótken. Áıel jaralanyp, aýrýhanaǵa jetkizilgen soń qaıtys bolǵan.

Kompanıa basshysy Dara Hosroýshahı qaıǵyly oqıǵaǵa qatty qaıǵyratynyn málimdedi. Kompanıa shtat bıligimen qaıǵyly oqıǵany tekserip jatyr.

Kólik qurastyratyn kompanıalar, onyń ishinde Ford pen General Motors júrgizýshisiz basqarylatyn kólikter jasaýǵa kóp qarjy quıyp otyr. Osyǵan deıin de ózge kompanıalar jasap shyǵarǵan júrgizýshisiz basqarylatyn kólikter apatqa ushyraǵan. Mysaly, 2016 jyly Google korporasıasy synaǵan kólik avtobýsty soǵyp ótken. Biraq ol kezde eshkim zardap shekpegen.