«Toıyń toıǵa ulassyn», «Qazaqtyń toıy bitpesin». Bul – qazaqtyń qulaǵyna ábden sińgen sózder. Bar jıǵan-tergenin toıǵa jumsaıtyn qazaqtar ony tegin jasasa qalaı bolar edi? Rejıser Qanaǵat Mustafınniń bastamasymen túsirilgen «Toı lúboı senoı» komedıalyq fılminde qazaq otbasy uzatý toıyn jasaý úshin qaltasynan bir tıyn da shyǵarmaıdy.

Búginde kez kelgen kınoteatrǵa kirseń, otandyq fılmder arasynda ájeptáýir tańdaý turady. Bir kúnge birneshe qazaq fılminiń tizilip turǵanyn kórgende keýdeńdi qýanysh kerneıdi. Sol tizimniń qataryna 21 naýryzdan bastap «Toı lúboı senoı» fılmi qosylatyn bolady. Keshe bul fılm jýrnalıserge kórsetildi.

Fılm jelisi boıynsha jergilikti telearnada jumys isteıtin Maqsat qaryndasynyń uzatý toıyna arnalǵan aqshany taksıde umytyp ketedi. Alaıda otbasyn renjitip almas úshin toı qamyn tolyqtaı óz moınyna alady. Sebebi toıǵa bir kún qalǵan. Bul ýaqyt Naýryz meıramyna sáıkes kelgendikten, telearna rejıseri qyzmetkerlerge merekelik shoý-baǵdarlama jasaýdy tapsyrady. Muny paıdalanǵan Maqsat bir oqpen eki qoıandy atady. Telearna stýdıasynda bir jaǵynan qaryndasynyń uzatý toıyn jasasa, ekinshi jaǵynan toı tikeleı efırden baǵdarlama retinde kórsetiledi.

Fılm sońynda taksıshi joǵalǵan aqshany ıesine qaıtaryp, al jigit súıgenimen qaýyshady. Al ústine shapan kıgen taksıshiniń Qydyr ata ekeni belgili bolady. «Naýryzda tek ǵajaıyp ornaıdy» degen ıdeıany alǵa tartqan kıno kórermenniń kóńilin birden baýrady. Muny kórsetilim bitkennen keıingi halyqtyń pikirinen baıqadyq.

«Qazaq kınosyna ádemi komedıa keldi. Bıyl túsirilgen komedıalyq fılmderdiń ishinde qazaqtyń salt-dástúrin jańa úlgide kórsetip, ony keremet jetkize bildi», - dep áserimen bólisti bir kórermen.

Rejıser Qanaǵat Mustafın bul jobanyń 5-6 jyl buryn daıyndalǵanyn aıtty. «Basty maqsat – tól merekemiz Naýryzdy nasıhattaı otyryp, halyqtyń kóńilin kóterý», - deıdi rejıser.

Qanaǵat Mustafınmen qosa rejıser Aıdyn Samahan da atalmysh joba aıasynda jumys istedi. Alǵashynda fılmniń ataýy «Jańa baqyt» dep atalǵan, keıin «Erekshe toı» dep ataldy. Aqyr sońynda joba avtorlary kelisip, «Toı lúboı senoı» degen ataýdy jón sanaǵan.

Fılm orys tilinde túsirilgenimen, rejıserler qazaq tilinde dýbláj bolatynyna sendirdi.

Aıta keteıik, Maqsattyń rólinde Shárip Serik, qaryndasynyń rólinde Aqbota-Nur Seıtmaǵambet oınady. Al olardyń ata-anasynyń róli ónerli jup Danagúl jáne Azat Seıtmetovterge buıyrdy.